Կիպրոսի Արտաքին գործերի նախարարության պաշտոնական կայքում hրապարակվել է, որ Կիպրոսի Կառավարությունն ուշադրությամբ ուսումնասիրում է Լեռնային Ղարաբաղում /Արցախում/ անհանգստացնող զարգացումները՝ հետեւելով ադրբեջանական զինված ուժերի կողմից սահմանին կիրառվող բռնություններին:
«Մենք դատապարտում ենք ուժի կիրառումը եւ մարդկային կորուստը, մասնավորապես քաղաքացիական զոհերը, եւ մենք պահանջում ենք, որ Ադրբեջանը հարգի ստատուս քվոն: Այս խնդրի խաղաղ կարգավորմանն այլընտրանք չկա, եւ Կիպրոսի կառավարությունը կարեւորում է ԵԱՀԿ Մինսկի խմբի եւ երեք համանախագահների դերն այստեղ:
Միեւնույն ժամանակ , մենք պահանջում ենք, որ Թուրքիան խուսափի որեւէ գործողությունից եւ հայտարարություն անելուց, որոնք հետո ապակայունացնում են ներկայիս իրավիճակը»,- գրված է հայտարարության մեջ: