Ապրիլի 4-ի երեկոյան ավելի քան 100 ազատամարտիկներ հավաքվել էին Նոյեմբերյան քաղաքի «Գվարզին» առեւտրական կենտրոնի առաջ: Հավաքվածների մեջ մեծ թիվ էին կազմում Այրում քաղաքի, Պտղավան եւ Հաղթանակ գյուղերի ազատամարտիկները: Հավաքին ներկա էր Տավուշի մարզպետ Հովիկ Աբովյանը, ով 1990-ական թվականներին կամավոր մասնակցել է ազատամարտին: Հավաքին մասնակցում էր նաեւ սահմանամերձ Կոթի գյուղի բնակիչ, ազատամարտիկ, գործարար Յուրա Հարությունյանը:
Վերջինս պատրաստակամություն հայտնեց զինվորական հանդերձանքով, սննդով եւ ամեն կերպ օգնել սահմանագոտի մեկնող ազատամարտիկներին: Յ. Հարությունյանը Վորոնեժում էր գտնվում,ադրբեջանցիների նախահարձակ լինելու մասին լուրը լսելով՝ վերադարձել է Հայաստան:
«1992թ. հունիսի 8-ին, մեկ օրում Նոյեմբերյանի սահմանագոտում կռվի ժամանակ 4 տղա վիրավորվեց՝ Յուրա անունով: Ես նրանց մեջ էի: Կռվում չամիչ չեն բաժանում: Բայց մենք արժանապատիվ տղերք ենք, պատրաստ ենք հանուն հայրենիքի նորից կռվելու, եթե հարկ է՝ զոհվելու»,- ներկաներին ասաց Յուրա Հարությունյանը:
Կարդացեք նաև
Վաղը՝ ապրիլի 5-ին նոյեմբերյանցի ազատամարտիկները կրկին կհավաքվեն, որպեսզի ՀՀ ՊՆ- հետ համագործակցությամբ որոշեն, թե կոնկրետ ինչ պետք է անեն հայրենիքը պաշտպանելու համար:
Ոսկան ՍԱՐԳՍՅԱՆ
