Թրաֆիքինգի եւ շահագործման ենթարկված անձանց սոցիալ-հոգեբանական աջակցություն ցույց տալու համար կառավարությունն ամեն տարի միջոցներ կհատկացնի: Այս մասին վաղը` մայիսի 5-ին, կառավարության նիստում կհայտնի աշխատանքի եւ սոցիալական հարցերի նախարար Արտեմ Ասատրյանը:
Ինչպես տեղեկանում ենք կառավարության նիստի օրակարգից, պարոն Ասատրյանն ամեն տարի պետք է ֆինանսների նախարարություն ներկայացնի բյուջետային ֆինանսավորման հայտ: Ֆիննախն էլ, հիմք ընդունելով յուրաքանչյուր նախորդ տարվա մարդկանց թրաֆիքինգի եւ շահագործման ենթարկված անձանց փաստացի քանակական տվյալները, յուրաքանչյուր հաջորդ տարվա համար միջոցներ կնախատեսի: Որոշումը նպատակ ունի Թրաֆիքինգի զոհին կամ շահագործման ենթարկված անձին վերաինտեգրել հասարակություն: Զոհին աջակցություն կտրամադրվի` կարիքների գնահատման հիման վրա:
Ընկերությունը, որը կստանձնի այդ մարդկանց աջակցությունը, կունենա կացարան, որտեղ էլ նրանց կտրամադրվի օրենքով նախատեսված սոցիալ-հոգեբանական աջակցությունը:
Ըստ կառավարության նախագծի, ժամանակավոր կացարանում զոհին կհատկացվի մահճակալ` անկողնային սպիտակեղենով, ներքին սպիտակեղեն եւ անձնական հիգիենայի պարագաներ, անհրաժեշտության դեպքում` երեխաների խնամքի պարագաներ, սնունդ՝ օրական առնվազն երեք անգամ:
Կարդացեք նաև
Լուսինե ԲՈԻԴԱՂՅԱՆ
