Երեկ Արցախյան պատերազմի մասնակից ազատամարտիկ Աղավնի Սահակյանն (լուսանկարում) Ազատության հրապարակում հանգանակություն էր հավաքում՝ Արցախում կռվող զինվորների եւ նրանց ընտանիքների համար:
«Առավոտի» հետ զրույցում նա նեղսրտեց, թե ինչպես է աղքատ բնակչությունը իր չունեցածից բաժին հանում զինվորի համար, 100-200 դրամ է ուղարկում, իսկ պաշտոնյաները «ժանտախտի մեջ խնջույք են անում»:
Նրա խոսքերով՝ «Պիտի ամաչի իշխանությունը, ղեկավարությունը, որ հիմա իրենք միլիոնները դիզած նստած են, դեռ մտածում են՝ ոնց անենք, որ յուրացնենք, ժողովուրդն է փող հավաքում: Եթե Հերմինե Նաղդալյան կոչվածը հասել է էն աստիճանի, որ ԱԺ -ում ասում է, որ 5 շրջանը պետք է տանք, Հերմինե՛ Նաղդալյան, դու հողի արժեքը գիտե՞ս, դու արյո՞ւն ես թափել էդ հողի վրա: Հիմա Հերմինե Նաղդալյանը թող սակարկի իր հանքերը, իր հանքերից ստացած եկամուտները, ինքը իրավունք չունի հող սակարկելու, ո՞վ է ինքը, գիտի՞ ինքը հողի արժեքը:Ցանկացած իշխանավոր միլիոններ ունի, ինչքան էլ քիչ ունենան՝ հո ժողովրդից շատ ունեն»:
Ըստ ազատամարտիկի՝ քանի կար՝ ՀՀԿ-ականները չէին խոսում, հենց Սերժ Սարգսյանն ասաց՝ ինչի՞ չեք խոսում, երբ մեզ քննադատում են՝ «արդեն բլբուլ կտրեցին», սկսեցին խոսել. «Հող ծախողներով հավաքվել են այնտեղ: Աղվան Վարդանյանն էլ լավ էլ կապկում է իշխանությունների բառապաշարը՝ մի թիզ էս կողմ, մի թիզ էն կողմ, բայց ավելի երկար, խաղաղ կապրենք: Անարժանապատիվ, հողդ հանձնած թշնամուն քեզ համար երկար ու խաղաղ ապրել է, հա՞: Դու հաղթող ժողովուրդ ես, դու ի՞նչ իրավունք ունես, հողդ տվել ես ու հանգիստ նստե՞լ ես, ինչի՞ն ես սպասում, գնայիր առաջ: Մեկ է, էլի էդ երեխեքը զոհվում են, չէ՞ ամեն օր: Էս 25 տարի է ՝ մաղվում ենք, զոհվում են մարդիկ»:
Կարդացեք նաև
Աղավնի Սահակյանը նաեւ քննադատեց առաջին նախագահ Լեւոն Տեր-Պետրոսյանի՝ Սերժ Սարգսյանի եւ Բակո Սահակյանի հետ ունեցած հանդիպումները. «Լեւոն Տեր-Պետրոսյանն ինչի՞ է գնացել Արցախ, դրանով ի՞նչ արեց»:
Մեր դիտարկմանը, որ դա համախմբման մասին է խոսում, զինվորի ոգին է ամրապնդում՝ ազատամարտիկը հակադարձեց. «Զինվորի ի՞նչը համախմբվեց: Քանի կար՝ Սերժ Սարգսյանը մոնղոլ-թաթար էր, ավազակապետ էին իշխանությունները, հիմա ի՞նչ պատահեց, ինչի՞ն է միացել: Միացել է, որ խորհո՞ւրդ տա, թե ոնց անեն, որ հողերը վաճառեն: Թող Լեւոն Տեր-Պետրոսյանը դրանով չամրապնդի, թող զենք առնի, զինվորի հոգսը հոգա: Իր այնտեղ գալով՝ զինվորը չի ամրապնդվում: Ամրապնդվում է, երբ ազատամարտիկը այնտեղ է գնում, ոչ թե, որ ճաղերի հետեւում են պահում: Վոլոդյա Ավետիսյանը, որ պետք է գնար կռվեր, հիմա ճաղերի հետեւում է: Գեւորգ Սաֆարյանն ի՞նչ էր արել: Հանցագործները վխտում են ազատության մեջ, իսկ այդ մարդիկ այնտեղ են, այդ մարդկանց ազատեք, թող գնան իրենց հայրենիքը պաշտպանեն»:
Հռիփսիմե ՋԵԲԵՋՅԱՆ
