Ապրիլի 22-ին մեր կայքում հրապարակված նյութն առնչվում է ոստիկանության Իջեւանի բաժնի քրեական հետախուզության բաժանմունքի հետախուզության գծով ավագ օպերլիազոր, ոստիկանության կապիտան Արտեմ Խաչատրյանի կատարած գործողությունների դեմ Տավուշի մարզի Լուսաձոր համայնքի ղեկավարի տեղակալ Սոֆյա Այվազյանի բողոքին: Վերջինս բողոքել է, որ կապիտան Խաչատրյանն իրենից 1 լիտր օղի է պահանջել, իրենից տանը այլ գործով բացատրություններ վերցնելու ժամանակ իմացած տեղեկությունները հետո փոխանցել գյուղի գրադարանավարուհուն, վերջինիս իր աշխատատեղում պաշտպանելու նպատակով սպառնացել է Լուսաձորի գյուղապետարանի աշխատողներին:
Այդ կապակցությամբ գրավոր դիմեցինք ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանին, նրան հիշեցնելով, որ մարտի 31-ին Իջեւանում կայացած հանդիպման ժամանակ ՀՀ ոստիկանապետ Վլադիմիր Գասպարյանը Սոֆյային խոստացել է, որ ոստիկանության Տավուշի մարզային վարչությունում հանգամանալից կքննվի կապիտան Արտեմ Խաչատրյանի կատարած գործողությունների օրինականությունը: Պարոն Ահարանյանին հարցրինք՝ ՀՀ ոստիկանապետ Վլադիմիր Գասպարյանը համաձա՞յն է, որ Արտեմ Խաչատրյանի կատարած, վերոհիշյալ հոդվածում նշված 3 արարքի համար նրան հայտարարված նկատողությունը նրա կատարածին համարժեք տույժ է: Ա. Ահարոնյանը մեզ գրավոր պատասխանել է . «Կարգապահական տույժի ընտրությունը կարգավորվում է բացառապես օրենսդրությամբ»:
Լուսաձոր համայնքի ղեկավարի տեղակալ Սոֆյա Այվազյանը հայտնեց, որ մտադիր է այդ առթիվ առաջիկայում հանդիպել Վլադիմիր Գասպարյանին:
Ոսկան ՍԱՐԳՍՅԱՆ
Կարդացեք նաև
