Հասարակական գործիչ Ազատ Արշակյանի մեկնաբանմամբ, ադրբեջանցիներն ուզում են, որ Երեւանն ունենա այն կարգավիճակը, որն այսօր ունի Վանը կամ Կարսը:
«Թուրքական էթնոսի համար ընդունելին այն է, որ Էջմիածինն ու Երեւանն ունենան այն կարգավիճակը, ինչ կարգավիճակ ունեն Արեւմտյան Հայաստանում մեր քաղաքները… Լինելու է պատերազմ, լարում, մենք պետք է նայենք մեր թիկունքը, ոչ թե իրենց հայտարարություններին, անընդհատ լինելու է պայքար, պետք չէ նայել, թե ինչ կասի ՌԴ-ն, Տաջիկստանը: Պետք է լարել մեր ուժերը, որ չարժանանաք այն ճակատագրին, ինչ մեր քաղաքները Արեւմտյան Հայաստանում»,- այսօր «Հայելի» ակումբում ասաց Ազատ Արշակյանը:
ԱԺ ՀՀԿ խմբակցության պատգամավոր Մկրտիչ Մինասյանն էլ շարունակեց. «Ինչ խաղեր էլ տան Ալիեւն ու Էրդողանը, ակնհայտ է՝ ունեն պանթուրքիզմի գաղափարը, մինչեւ Արեւելք ամբողջ տարածքն իրենցով անել»:
Անդրադառնալով Ժիրայր Սեֆիլյանի կոչին, թե մինչեւ «Ֆորմուլա 1»-ը հարմար ժամանակն է կորցրած տարածքները հետ բերելու, պարոն Մինասյանն ասաց՝ պետք է ավելի շրջահայաց լինել, իրողություններից առաջ չընկնել:
Կարդացեք նաև
Ազատ Արշակյանն էլ կարծում է՝ հետ պետք է վերցնել պատժաչափով. «Նույնիսկ ավելին, քան կորցրել ենք, հարկավոր է հետ վերցնել մի օր շուտ: Ոչ միայն Ժիրայր Սեֆիլյանը, այլ ամբողջ ընդդիմությունը պետք է դա պահանջի իշխանություններից»:
Նա, լրատվամիջոցների լուրերին հղում տալով, ասաց՝ մարտի 30-ին կամ 31-ին արձակուրդ են ուղարկել սահմանապահ գնդի հրամանատարին:
Դիտարկմանը, թե բայց ի՞նչ իմանար, որ պատերազմ է լինելու, պարոն Արշակյանը պատասխանեց. «Որտեղից իմանալու համար չիմացողին արդեն պատժել են: Հետախուզությունն այդքան թույլ չի եղել, տեղյակ է պահել: Ո՞վ է թույլ տվել սահմանապահ գնդի հրամանատարին գնալ արձակուրդ ու վերադառնալ պատերազմից հետո»:
«Պետք է պատժել, բայց ոչ թե այս գլխից որոշում եք, թե սա չպետք է արձակուրդ գնար: Նրանք որոնք թերացել են, պետք է պատասխան տան, համաձայն եմ, բայց եկեք համաձայնենք, որ մենք պատվով ենք դուրս եկել փորձությունից»,- ասաց Մկրտիչ Մինասյանը:
«Չէ, ես ձեզ փուշ եմ արձակում, դափնի չեմ ուզում տալ»,- հակադարձեց Արշակյանը,- «Ինչո՞ւ եք ձեզ մխիթարում, դուք ի՞նչ եք արել քաղաքական իշխանությունը, ինչո՞ւ եք թույլ տվել, որ հասնի դրան, ո՞ւր են մեր դրոնները, սպառազինությունը: Նախ եւ առաջ պարտավոր էիք ապահովել անհրաժեշտ քանակությամբ զենք- զինամթերք, հանդերձանք, հետո ինչ կմնար, տայիք առողջապահությանը, կրթությանը, հետո վերցնեիք դուք՝ կառավարության բյուրոկրատներդ»:
Արփինե ՍԻՄՈՆՅԱՆ
