Այսօր Գյումրու Մուշ թաղամասում, որտեղ բնակվում էր ավագ-լեյտենանտ Մերուժան Ստեփանյանը, ի հիշատակ նրա՝ ցայտաղբյուր բացեցին:
Հիշեցնենք, որ 1993 թվականին ծնված Մերուժանը Թալիշի պաշտպանության ժամանակ 3 հոգու հետ հակառակորդի բանակից 20 հոգու էր ոչնչացրել, ծանր վիրավորվել էր ու մահացել Մուրացանի զինվորական հոսպիտալում:
Հուշաղբյուրը կառուցվել էր նրա ընկերների նախաձեռնությամբ՝ հերոսի հիշատակը վառ պահելու համար: Ընկերներից մեկը՝ Լեւոն Երանոսյանը պատմեց, որ Մերուժանին հիշում է միայն զինվորական համազգեստով, նա փոքրուց այդ համազգեստն էր հագնում, եւ իր զինվորական հոր հետ հաճախակի էր զորամասերում շրջում:
Կարդացեք նաև
Ընկերները Մերուժանին տեսել են ամեն արձակուրդ վերադառնալիս, երբ մի քանի րոպեով տուն էր մտնում, տնեցիներին բարեւում ու շտապում էր ընկերների մոտ: Նրան հիշում են որպես կատակասեր ու նեղին հասնող մարդու:
Մերուժանի հայրը՝ Արթուր Ստեփանյանը, եւս պատմում է, որ ռազմական դաստիարակությունը Մերուժանի մոտ մանուկ հասակից էր, չկար մի միջոցառում, որ Մերուժանը չհագներ զինվորականի շորեր:
Ցայտաղբյուրը բացելու պատիվը տրվեց ընկերներին, մարդիկ հերթով մոտենում էին ու ջուր խմում ցայտաղբյուրից: Մերուժանենց շենքի պատին փակցվեց նաեւ նրա դիմաքանդակը՝ հպարտ, ժպտացող հայացքով:
Հիշեցնենք, որ Մերուժանը նշանված էր, հարսնացուն Շուշիից է ու երկու ամսից նրանց հարսանիքը պետք է լիներ:
Նունե ԱՐԵՎՇԱՏՅԱՆ
