Այս եղանակով պատրաստելու համար հարմար է ցանկացած միջին չափսի ձուկ՝ իշխան, սիգ, կարմրախայտ, սիբաս, դորադո, գետի ձկներ: Շատ համեղ եւ հյութեղ է ստացվում: Միայն թե՝ փշոտ ձկների դեպքում պետք է զգույշ լինել, քանի որ փշերը չեն «հալվում», ինչպես տապակելու պարագայում:
Անհրաժեշտ մթերքները
Միջին կամ փոքր չափսի ձուկ(3-5 հատ)
Լոլիկ-5-6 հատ
Կիտրոն-1-2 հատ
Սամիթ-մոտ մեկ փունջ
Թարխուն-մի քանի ճյուղ
Կծու թարմ պղպեղ (կարող է լինել ինչպես կանաչ ծիծակ, այնպես էլ՝ կարմիր չիլի)- ըստ ճաշակի
Կարագ-100 գրամ
Սպիտակ չոր գինի-100 գրամ
Աղ, սեւ պղպեղ-ըստ ճաշակի
Պատրաստման եղանակը:
Կարդացեք նաև
Ձուկը մաքրեք, լավ լվացեք: Եթե թարմ եւ փոքրիկ ձկնիկներ են, կարող եք չհեռացնել լողակները, հակառակ դեպքում՝ կտրեք ինչպես կողքի, այնպես էլ պոչի լողակները: Լվացեք բանջարեղենն ու կանաչին:
Հրակայուն ամանի (կարող է լինել ինչպես մետաղյա, այնպես էլ՝ կերամիկայից, կավից կամ ապակյա աման, որը թույլատրվում է դնել ջեռոցը) հատակին շարեք սամիթի մի մասը եւ մեկ-երկու ճյուղ թարխուն: Վրան դրեք մի քանի շերտ կտրատած լոլիկ եւ կիտրոնի 1-2 շերտ: Կանաչու եւ բանջարեղենի վրա պետք է դրվեն ձկները, բայց այնպես, որ ձկները չդիպչեն ամանին, այլ գտնվեն սամիթա-բանջարեղենային «ներքնակի» վրա:
Ձկների փորիկների մեջ եւ վրան աղ ու պղպեղ ցանեք, փորիկների մեջ տեղավորեք մեկական շերտ կիտրոն եւ լոլիկ եւ մեկական ճյուղ թարխուն:
Վրայից ձկները ծածկեք սամիթա-թարխունա-բանջարեղենային «վերմակով»: Ապա դրեք մի քանի կտոր կարագ, մի քանի կտոր կծու պղպեղ, նորից աղ եւ սեւ պղպեղ արեք, լցրեք գինին (մոտ կես բաժակ) եւ դրեք 200 աստիճան տաքացրած ջեռոցը մոտավորապես 40-45 րոպեով: Ընդունված է ձկան պատրաստ լինելը ստուգել «աչքը դուրս գալով»՝ եթե տեսնեք, որ ձկան աչքը «դուրս է եկել», ապա այն պատրաստ է:
Մատուցեք ձուկը՝ վրան դնելով իր հետ եփված բանջարեղենից եւ լցնելով մեկ-երկու գդալ այն հյութից, որն առաջացել է եփվելու ընթացքում:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
03.09.2016
