Աջափնյակ եւ Դավթաշեն վարչական շրջանների ընդհանուր իրավասության առաջին ատյանի դատարանում տեղի ունեցավ «Նոր Հայաստան» նախաձեռնության անդամ, Շուշիի առանձնակի գումարտակի հրամանատար Ժիրայր Սեֆիլյանն ընդդեմ «Արմենիա» հեռուստաընկերության գործով նախնական դատական նիստը:
Դատական նիստին չէին ներկայացել «Սուր անկյուն» հաղորդաշարի հեղինակ եւ վարող Վահե Ղազարյանը եւ լրագրող Նելլի Հարությունյանը: Սակայն, վերջիններս դատարան միջնորդություն էին ներկայացրել, որով նշում են, որ գործով պատշաճ պատասխանող պետք է հանդիսանա «Արմենիա TV»-ին, քանի որ հաղորդման պատասխանատուն է, իսկ իրենք պատշաճ պատասխանող կողմեր չեն : Ժիրայր Սեֆիլյանի ներկայացուցիչ Տիգրան Հայրապետյանը առարկեց այդ միջնորդությանը, քանի որ ըստ նրա, միայն ընկերության վրա կատարված գործողությունների պատասխանատվությունը դնելը ճիշտ չի լինի: Դատարանը մերժեց միջնորդությունը:
Տիգրան Հայրապետյանը ասաց, որ հայցի առարկան է պարտավորեցնել պատասխանողներին՝ «Արմենիա TV» ՓԲԸ-ին, Վահե Ղազարյանին եւ Նելլի Հարությունյանին հրապարակային ներողություն խնդրել եւ «Սուր անկյուն» հաղորդաշարի առաջիկա առաջին իսկ հաղորդման մեջ հերքել զրպարտություն պարունակող փաստացի տվյալները եւ հրապարակել դրանց վերաբերյալ Ժիրայր Սեֆիլյանի պատասխանը:
Սակայն, հեռուստաընկերության ներկայացուցիչը նշեց, որ «Արմենիա» հեռուստաընկերությունը հեռարձակել է, հաղորդավարը մեկնաբանել է, լրագրողը ներկայացրել է. չէին կարող երեքն էլ նույն գործողությունն իրականացնել:
Կարդացեք նաև
Դատական նիստը հետաձգվեց, հաջորդ դատական նիստը տեղի կունենա նոյեմբերի 3-ին: Հիշեցնենք, որ «Սուր անկյուն» հաղորդաշարը հունիսի 12-ի իր թողարկման ընթացքում հեռարձակել է «Հաղթանակը շատ հայրեր ունի» հետաքննությունը, որը Ժիրայր Սեֆիլյանի եւ իր համախոհների պնդմամբ, Սեֆիլյանի պատիվը, արժանապատվությունը եւ բարի համբավը արատավորելու նպատակ ունեն:
Ամի ՉԻՉԱԿՅԱՆ
դե՜հ ոչինչ… մի քիչ եւս ժամանակի հարց է, Ժիրայր… Յաղթանակը մօտ է… շուտով քո խմբակի հետ կը տիրանաք իշխանության, եւ – ի միջի այլոց – այս հեռուստաընկերությունը կը փակէք, եւ այդ երկու – ինչպէս նաեւ շատ մը այլ – լրագրողների ել պատշաճ դասը կու տաք…