«Իրենք խուսափում են ստեղծել հասարակական խորհուրդ, որովհետեւ նիստերի ժամանակ կլինեն առողջ առաջարկություններ, որն այսօր երեւի ձեռնտու չէ կառավարությանը»,- հոկտեմբերի 11-ին «Նոյյան տապան» մամուլի ակումբում լրագրողների հետ հանդիպման ընթացքում ասաց ՀՀ-ում ուղեւորափոխադրումների կազմակերպում հասարակական կազմակերպության նախագահ Պողոս Օղլուկյանը:
Նա նշեց, որ հասարակական տրանսպորտում առկա խնդիրներին պետք է տալ լուծումներ. «Դուք գտնո՞ւմ եք, որ բոլոր կանգառները ճիշտ տեղերում են դրված: Աշխարհում ոչ մի տեղ չեք տեսնի խաչմերուկի բերանում կանգառ, մեզ մոտ երկաթներով ամրացված կանգառի նշանը դրված է: Որտե՞ղ եք տեսել աշխարհում 14-16 ժամ աշխատող եւ ասենք թե 120 հազար դրամ աշխատավարձ ստացող, դա էլ չկա»:
Պողոս Օղլուկյանը ընդգծեց, որ շատ առաջարկներ ունի կապված գծերի, կանգառների, ուղեւորափոխադրման հետ. «Շատ հարցեր կան, որոնք պետք է լուծվեն: Ինչո՞ւ են խուսափում մեր առաջարկություններից: Եթե ձեզնից ինչ-որ մեկը տրանսպորտի հետ կապված լավ առաջարկություն անի, ես չեմ լսի՞ դա, կլսեմ, կուզեմ օգնել»:
Հայաստանի տոնավաճառներ հասարակական կազմակերպության նախագահ Գագիկ Դանիելյանը հավելեց, որ առեւտրի համար չորս կարեւոր կետ կա՝ հարկայինը, տոնավաճառի տեր-վաճառող հարաբերությունները, բանկերի արհամարհական վերաբերմունքը փոքր եւ միջին բիզնեսին եւ ուղեւորափոխադրումը, որի իրագործումից հետո ոլորտում փոփոխություններ կլինեն. «Մենք ուզում ենք հասարակական խորհուրդները ստեղծվեն, նրանց միջոցով տեղյակ պահեն բոլոր տոնավաճառներում: Մենք անգամ առաջարկում ենք անվճար հաշվապահություն, իրավաբանական ծառայություն բոլոր տոնավաճառներում, որովհետեւ 60-անց մարդիկ են առեւտրով զբաղվողները:
Կարդացեք նաև
Ես համաձայն եմ, որ մենք քիչ ենք հարկ տալիս, բայց հաշվի առեք, որ առեւտրականները իրենց գոյությունն են պահում, որ չփախնեն երկրից: «Գալստուկ» կապելով, մեկ էլ կոստյում հագնելով օրենք չի փոխվի, ժողովրդի վիճակը չի բարելավվի: Այն մարդը պետք է գնա վարչապետի մոտ, որ ներսից է, գիտի, ոչ թե «գալստուկ» կապողները գնում են նստում աթոռին, ասում՝ մենք համաձայն ենք»:
Ամի ՉԻՉԱԿՅԱՆ
