Ռուս նկարիչ-ակցիոնիստ Պյոտր Պավլենսկին իր քաղաքացիական կնոջ՝ Օքսանա Շալիգինայի և երկու դուստրերի հետ լքել է Ռուսաստանը և պատրաստվում է քաղաքական ապաստան խնդրել Ֆրանսիայից:
Նկարիչը իր հայտարարության մեջ պատմել է, որ իր և իր կնոջ նկատմամբ քրեական գործ է հարուցված ՌԴ ՔՕ 132-րդ հոդվածով («Սեռական բնույթի բռնի գործողություններ») այն բանից հետո, երբ «ընդդիմադիր թատրոններից մեկի դերասանուհին», որի հետ իրենք վերջերս էին սկսել շփվել, իրենց դեմ բողոք է ներկայացրել:
«Կասկածների տեղիք չէր տալիս: Նա շփման, աջակցության և հարաբերությունների կարիք ուներ: Մենք բաց ենք եղել մարդկանց նկատմամբ և նրան հնարավորություն տվեցինք մոտենալ մեզ հետ: Դա դարձավ ճակատագրական»,- ասել է նկարիչը:
Պավլենսկին նշել է, որ իրենց Ռուսաստանում այդ հոդվածով սպասվում է մինչև 10 տարվա ազատազրկում:
Կարդացեք նաև
Պավլենսկուն նշանավոր դարձրեց «Pussy Riot» պանկ-խմբին աջակցող ակցիան։ 2012 թվականի հուլիսի 23-ին նկարիչը թելով կարված բերանով պիկետի էր կանգնած Կազանսկի տաճարի մոտ՝ ձեռքին պաստառ։ Պավլենսկին նշում է, որ ուզում էր ցույց տալ ժամանակակից նկարչի վիճակը Ռուսաստանում` ազատ խոսքի արգելքը:
2015 թ. նոյեմբերի 9-ի գիշերը Պավլենսկին բենզին լցրեց և այրեց Լուբյանկայում ՌԴ Անվտանգության դաշնային ծառայության գլխավոր դուռը։ Երեսուն վայրկյան անց նա ձերբակալվեց։ Ըստ Պավլենսկու՝ «Լուբյանկայի այրվող դուռը ձեռնոց է, որը հասարակությունը նետում է ահաբեկչական վտանգին»:
Պատրաստեց՝ Վիկտորյա ԱՆԴՐԵԱՍՅԱՆԸ
