ԱԺ պատգամավոր Էլինար Վարդանյանն այսօր ԱԺ պետաիրավական հարցերի հանձնաժողովի քննարկմանը ներկայացրեց նոր նախագիծ, որով առաջարկում է «Վարչական իրավախախտումների մասին» օրենքում փոփոխություն կատարել:
Երեւանի քաղաքային համայնքի վարչական տարածքում սահմանվել է ավտոկայանատեղիի տուրքերի հետեւյալ դրույքաչափերը՝ յուրաքանչյուր մեկ ժամվա համար՝ 100 դրամ, մեկ օրվա համար՝ 500 դրամ, մեկ շաբաթվա համար՝ 1000 դրամ, մեկ ամսվա համար` 2000 դրամ եւ մեկ տարվա համար՝ 12000 դրամ: Տեղական տուրքը չվճարելու դեպքում տուգանք է նշանակվում` սահմանված նվազագույն աշխատավարձի հնգապատիկի չափով: Մեկ ժամվա համար սահմանված 100 դրամը չմուծելու դեպքում օրենսգրքով սահմանվում է 5000 դրամ տուգանք, ինչը ավելին է քան երկու ամսվա համար նախատեսված ավտոկայանատեղի տուրքը՝ առաջացնելով անհամաչափ մեծ պատասխանատվություն տվյալ իրավախախտման համար:
Հաշվի առնելով իրավախախտման եւ պատասխանատվության ակնհայտ անհամաչափությունը՝ նախագծով առաջարկվում է մեկ ժամվա համար չվճարած 100 դրամ տուրքի համար սահմանել տուգանք նվազագույն աշխատավարձի չափով, ինչը համարժեք է ավտոկայանատեղի մեկ շաբաթվա դրույքաչափին՝ 1000 դրամ: Հանրապետությունում առկա ծանր սոցիալ-տնտեսական պայմաններում առաջարկվող նախագիծը կնպաստի նաեւ քաղաքացիների սոցիալական բեռի որոշակի թեթեւացմանը:
Էլինար Վարդանյանն ասաց. «Զավեշտի է վերածվում գործող օրենքով՝ 100 դրամի համար քաղաքացուն գալիս է 5000 դրամ տուգանք»:
Կարդացեք նաև
Տիգրան Ուրիխանյանն ասաց, որ սրանով լեգիտիմություն ենք տալու կարմիր գծերին. «Որպես հակակարմիրգծային ճակատամարտի պայքարող, ունեմ հստակ դիրքորոշում: Բայց չէ՞ որ այդ կարմիր գծերն ընդհանրապես պիտի վերացնենք»:
Էլինար Վարդանյանը չհամաձայնեց, նա ասաց, որ սա կարմիր գծերին վերաբերող հարց չէ:
Կառավարության տեսակետը ներկայացնելիս արդարադատության նախարար Արփինե Հովհաննիսյանն ասաց. «Մենք այս հարցը քննարկման առարկա դարձրել ենք նաեւ Վարչական իրավախախտումների վերաբերյալ օրենսգրքի նոր նախագծով»: Նա ասաց, որ այդ նախագիծը վերջապես ԱԺ-ում է եւ այլեւս մինչեւ զավեշտի հասնող ձեւակերպումներ չենք տեսնի այդ օրենսգրքում:
Արփինե Հովհաննիսյանի խոսքերով՝ իրենք բացասական գնահատական են տվել ոչ թե գաղափարին, այլ՝ չափին: 1000 դրամ չափը, ըստ նախարարի, չի ծածկում վարչական ծախսը: Այն որեւէ ձեւով արդարացված չէ: Արփինե Հովհաննիսյանը նշեց, որ իրենց համար ընդունելի է 3000-5000 դրամ չափը տուգանքի:
Էլինար Վարդանյանը համաձայնեց նախագիծը մեծ օրակարգ մտցնել եւ քննարկումների ընթացքում տուգանքի չափը քննարկել:
Հռիփսիմե ՋԵԲԵՋՅԱՆ
