Ալեքսեյ Նավալնիի կոռուպցիայի դեմ պայքարի հիմնադրամը հրապարակել է հետաքննության արդյունքները, որոնց համաձայն՝ Ռուսաստանի վարչապետ Դմիտրի Մեդվեդևը հանդիսանում է բազմաթիվ օբյեկտների, անշարժ գույքի սեփականատեր: «Դմիտրի Անատոլյեվիչ Մեդվեդևը անվնաս և կոմիկ կերպար չէ, ինչպես թվում է: Նա լուրջ կոռուպցիոներ է»,-ասվում է հրապարակման մեջ:
Ինչպես հաղորդում է BBC-ն, ՌԴ վարչապետի մամուլի խոսնակը հայտարարել է, որ նյութը վառ արտահայտված նախընտրական բնույթ է կրում և հրաժարվել է մեկնաբանել այն:
Հետաքննության համաձայն՝ Մեդվեդևը հանդիսանում է ակտիվների սեփականատեր, որոնք հնարավորություն ունի կառավարել ոչ կոմերցիոն հիմնադրամների ցանցի միջոցով. վերջիններս ղեկավարվում են նրա համակուրսեցիների կողմից: Նավալնիի հիմնադրամը նման ակտիվների թվում հայտնաբերել է խաղողի այգիներ իտալական Տոսկանայում, զբոսանավեր, պալատներ, որոնք պաշտոնապես պատկանում են օֆշորային ընկերության:
Հիմնադրամի հրապարակման համաձայն՝ «Միասնական Ռուսաստան» իշխող կուսակցության ղեկավար Մեդվեդևը սեփականություն ունի երկրի ամբողջ տարածքում. նրան են պատկանում հողակտորներ, բնակարաններ, ագրոհամալիրներ, գինու գործարաններ ինչպես Ռուսաստանում, այնպես էլ արտասահմանում: Մասնավորապես նշվում է, որ Մեդվեդևին է պատկանում հինգ միլիարդ ռուբլի արժողությամբ առանձնատուն մերձմոսկովյան Ռուբլյովկայում։
Կարդացեք նաև
Ալեքսեյ Նավալնին պնդում է, որ հետաքննության տվյալները բավարար են, որպեսզի վարչապետի գործունեությամբ հետաքրքրվեն իրավապահ մարմինները։
Պատրաստեց Վիկտորյա ԱՆԴՐԵԱՍՅԱՆԸ
