«Սպասելի էր, որ Էրդողանը, թեեւ փոքր տարբերությամբ, հաղթանակ է տանելու: Մեծ քաղաքները, այդ թվում՝ Անկարան, Իզմիրը, դեմ են քվեարկել, նաեւ՝ միջերկրածովյան շրջանները: Սա հետաքրքիր արդյունք է: Ստացվում է, որ Թուրքիայի բնակչության ավելի կրթված եւ զարգացած պայմաններում ապրողները դեմ են այս փոփոխություններին»,-«Արմենպրես»-ում այսօր լրագրողների հետ հանդիպմանն անդրադառնալով երեկ Թուրքիայում կայացած սահմանադրական հանրաքվեին, ասաց թուրքագետ Ռուբեն Սաֆրաստյանը:
Նա նկատեց, որ Թուրքիայի քրդաբնակ շրջանները եւս հիմնականում դեմ են քվեարկել. «Քրդամետ կուսակցությունը՝ «Ժողովուրդների դեմոկրատական կուսակցությունը», գլխատված է: Ղեկավարությունը բանտերում է: Եթե գլխատված չլիներ, «դեմ»-ն ավելի մեծ ձայներ կստանար, ինչը կարեւոր նշանակություն կունենար: Ընդհանուր առմամբ, սահմանադրական բարեփոխումները Թուրքիայի բնակիչներին առանձնապես հոգեհարազատ չեն, երկիրը երկու հատվածի է բաժանվել»:
Կարդացեք նաև
Փորձագետը կարծում է, որ առաջիկա երկու տարում Թուրքիայում լարված քաղաքական իրավիճակ է լինելու, քանի որ պետք է կյանքի կոչվեն սահմանադրական փոփոխությունները, քրդական հարցն էլ կսրվի. «Այնուամենայնիվ, Թուրքիան վերադարձավ Աթաթուրքի կառավարման շրջանին՝ միանձնյա իշխանությանը»:
Լուիզա ՍՈՒՔԻԱՍՅԱՆ
