ԿԳՆ հանրակրթության վարչության պետ Աշոտ Արշակյանն Aravot.am-ի հետ զրույցում անդրադարձավ ԱԺ ՀՀԿ խմբակցության պատգամավոր Գալուստ Սահակյանի՝ News.am-ի հետ զրույցում հնչեցրած կարծիքին, թե. «Ռուսաց լեզվի հայեցակարգը հայոց բթամտությունն է… Հայաստանում որեւէ լեզու չի կարող հայոց լեզվին հավասար կարգավիճակ ստանալ»:
Աշոտ Արշակյանը նախ նկատեց. «Իհարկե, ռուսերենը, եւ առհասարակ՝ որեւէ լեզու, չի կարող հայերենին հավասար կարգավիճակ ունենալ, որովհետեւ հայերենը մեր լեզուն է»:
Ապա Արշակյանն անդրադարձավ փորձագետների պնդումներին, թե հայեցակարգը ՀՀ-ին պարտադրվել է Ռուսաստանի կողմից: «Չգիտեմ՝ իրենք ինչ են պնդում, դա փորձագետների սուբյեկտիվ կարծիքն է: Կարող եմ ասել՝ եթե կարդաք հայեցակարգը, դրանում չեք տեսնի «երկրորդ լեզու» կամ «կարգավիճակ»…: Դա ընդամենը ռուսերենի դասավանդման որակի բարելավման հայեցակարգ է: Այն մշակվել է՝ հաշվի առնելով այն խնդիրները, որոնք կապված են կրթության հետ: Քաղաքացին դպրոցն ավարտելուց հետո պետք է կարողանա տիրապետել որեւէ օտար լեզվի»,-նշեց ԿԳ պաշտոնյան:
Աշոտ Արշակյանի հավաստմամբ՝ հայեցակարգով ռուսերենին որեւէ առավելություն չի տրվում, այն չի առանձնացվում մյուս օտար լեզուներից. «Դասավանդման առանձնահատկությունները հաշվի առնելով ենք ռուսերենի համար առանձին հայեցակարգ մշակել: Այն դասավանդվում է 2-րդ դասարանից եւ պարտադիր ուսուցանման լեզու է»:
Լուիզա ՍՈՒՔԻԱՍՅԱՆ
