Էրեբունի եւ Նուբարաշեն վարչական շրջանների ընդհանուր իրավասության դատարանում այսօր քրեական հեղինակություն համարվող Լեւոն Ղազարյանի («Երրոդմասցի Լյովիկ») եւ նրա ընկերներ Դրաստամատ Թադեւոսյանի եւ Մեսրոպ Նազարյանցի սպանության գործով նիստը կրկին չկայացավ. ընթերակային (ՀՀ չափահաս քաղաքացի, որը մասնակցում է քննչական գործողության կատարմանը` հաստատելու համար դրա կատարման փաստը, բովանդակությունը, ընթացքը և արդյունքները.-խմբ.) դեռ չէր հաջողվել գտնել ու դատարան հրավիրել: Խնդիրն այն է, որ նշված հասցեում Յուրա Գալստյան անունով անձ չի բնակվում:
Մեղադրող-դատախաղ Արամ Արամյանը կարծիք հայտնեց, որ կարելի է կրկին սպասել, գուցե հաջորդ նիստում նրան հաջողվի գտնել ու ծանուցել: Ամբաստանյալների պաշտպաններից փաստաբան Լուսինե Սահակյանն առարկեց՝ ասելով, որ պետք է առաջ անցնել, ոչ թե անտեղի ձգձգել գործի քննությունը: «Լա՞վ եք պատկերացնում այս մարդկանց առաջադրված մեղադրանքը…Մի հատ ապացույց չեք բերել դատարան, մի բան էլ ասում եք՝ սպասենք»,-դժգոհեց նա: Այնուամենայնիվ, նախագահող դատավոր Արտուշ Գաբրիելյանը որոշեց «սպասել»՝ հաջորդ նիստը նշանակելով հոկտեմբերի 10-ին, ժամը 12:00-ին:
Հիշեցնենք, որ այս գործով մեղադրյալներն են Սարգիս Գրիգորյանը (մականունը՝ «Ծգլ»), Սարգիս Հախանումյանը (մականունը՝ «Տլե»), Վահան Հակոբյանը (մականունը՝ «Գաստիկ»): Նրանք մեղադրվում են 2015-ի մարտի 4-ին «Նուբարաշեն» քրեակատարողական հիմնարկի մոտ տեղի ունեցած՝ սպանության եւ ապօրինի զենք կրելու, պահելու մեջ։
Լուիզա ՍՈՒՔԻԱՍՅԱՆ
