Շել Սիլվերսթին բեսթսելլեր գրողի «Անձնվեր ծառը» գիրքը հոկտեմբերի 24-ին ներկայացվեց ընթերցողներին: «Բյուրոկրատ» գրախանութում տեղի ունեցած շնորհանդեսին ներկա էին Հայաստանում Ամերիկայի դեսպան Ռիչարդ Միլսը, դեսպանատան Տեղեկատվական ռեսուրսների կենտրոնի տնօրեն Ներսես Հայրապետյանը:
«Արևիկ» հրատարակչության տնօրեն Սաբեթ Հովհաննիսյանը հանդիպման սկզբում ներկայացրեց գրքի բովանդակությունը՝ ընդգծելով, որ չնայած ամեն էջում երկու–երեք տող է և հիմնականում նկարազարդումներ են, այն տարածված է ամբողջ աշխարհում: Դրա համար էլ գրքում նշել են՝ զրոյից 99 տարեկան մարդկանց համար:
Թարգմանիչ Լիլիթ Բոյամյանի խոսքերով՝ նա գրքին ծանոթացել է 90-ականներին, երբ Ամերիկայում պատրաստվում էր տարրական դասարանի աշակերտներին դասավանդել: Աշակերտներն արդեն գիտեին՝ ամեն անգամ գիրքը կարդալիս ուսուցչուհին հուզվելու է:
«Գիրքն ունի մեկ պարզագույն միտք՝ կյանքը հարատև չի, ամեն ինչ անցողիկ է ,միայն սերն է անշահախնդիր»,- հուզմունքը զսպելով ասաց թարգմանչուհին:
Հայաստանում Ամերիկայի դեսպան Ռիչարդ Միլսը շնորհակալություն հայտնեց թարգմանչին՝ հայ մանկահասակ ընթերցողին այս գիրքը ներկայացնելու համար.«Կարծում եմ՝ ամեն մեկն իր համար պիտի պարզի թե ով է անձնվեր ծառը»:
Դեսպանը նշեց՝ իր զարմիկի համար ինքն այս գիրքը բազմիցս կարդացել է: «Հավատացնում եմ ՝ դուք միակ մարդը չեք, ով հուզվել է սա կարդալիս»,- դիմեց թարգմանչին Ռիչարդ Միլսը:
Գրքի մասին իր կարծիքը հայտնեց նաև Ներսես Հայրապետյանը:
«Ով այս գիրքը կարդա, սիրահարվելու է սրան: Այն և մեծերի համար է և փոքրերի: ՉՆայած գրքում սեր բառը երկու անգամ է գործածվել, ընթերցողի մոտ կարծիք է ձևավորվել, որ այն սիրո մասին է: Բայց այն իրականում նվիրման և երջանկության մասին է» ,-ընդգծեց Հայրապետյանը:
Կարինե ԿԻՐԱԿՈՍՅԱՆ
