ՀՀ նախագահ Արմեն Սարգսյանի հետ հարցուպատասխանի ժամանակ այսօր ուսանողներից մեկը մի խնդրի մասին բարձրաձայնեց. «ԵՊՀ շատ շրջանավարտներ չեն կարողանում մասնագիտությամբ աշխատել: Երբ ցանկանում ենք պետական հիմնարկներ ընդունվել, 3-5 տարվա աշխատանքային փորձ են պահանջում: Խնդրի լուծումն ինչպե՞ս եք տեսնում»: Արմեն Սարգսյանը նախ որպես օրինակ հայտնեց՝ վերջերս նախագահի աշխատակազմում թափուր աշխատատեղերի համալրման մասին էր հայտարարվել: «Այժմ 22 ազատ աշխատատեղի համար դիմել է 6850 մարդ…ինձ ուրախացնում է, որ մեծ մասը երիտասարդներ են, բայց ստիպված ենք ընդամենը 22-ին ընտրել»:
Արմեն Սարգսյանը նկատեց՝ հնարավոր չէ բոլոր դեպքերում համալսարանն ավարտելիս անմիջապես աշխատանքի անցնել, ինչպես Խորհրդային միության տարիներին էր: Ըստ նախագահի՝ խնդիրը կրթական համակարգի եւ աշխատաշուկայի փոխկապակցման շրջանակում պետք է դիտել. «Համալսարաններ կան, որտեղ կրկնվում են մասնագիտությունները, դասախոսներն էլ միաժամանակ մի քանի բուհում են դասավանդում»:
Արմեն Սարգսյանը նշեց, որ իր համոզմամբ՝ աշխատաշուկայի խնդիրը վարչապետի եւ կրթության նախարարության ուշադրության կենտրոնում է, եւ նրանք անպայման կաշխատեն այդ ուղղությամբ:
https://www.facebook.com/aravot.am/videos/2066359983382506/
Լուիզա ՍՈՒՔԻԱՍՅԱՆ
