ԵԱՀԿ Մինսկի խմբի համանախագահները հանդես են եկել իրենց հերթական հայտարարությամբ: Նրանք հայտարարություններ են անում ամեն պատեհ առիթով, նաև բարձրաստիճան հանդիպումներից հետո: Իրենց միջնորդության ընթացքում մի քանի տասնյակ անգամ համանախագահները իրենց գնահատականներն ու սպասելիքներն են ներկայացրել հանրությանը: Ծանոթ լինելով նման հայտարարությունների մշակման մեխանիզմներին, ասեմ, որ այդ հայտարարությունները, կամ, առնվազն, բովանդակության առանցքային դրույթները, համաձայնեցվում են կողմերի հետ:
Այս մեկը առանձնանում է թե ոճով և թե բովանդակությամբ: Համանախագահները, երկու երկրների ԱԳ նախարարների հետ համատեղ, նախ դրվատանքով են խոսում շփման գծում խախտումների նշանակալի նվազման վերաբերյալ, որը արդյունք է մեր վարչապետի և Ադրբեջանի նախագահի՝ Դուշանբեում ձեռք բերված համաձայնության:
ԱԳ նախարարներն էլ իրենց հերթին վերահաստատել են լարվածության նվազեցման ու խնդրի խաղաղ կարգավորման ուղղությամբ ինտենսիվ աշխատանք իրականցնելու իրենց պատրաստակամությունը: Առհասարակ, փորձ է արվել ներկայացնել մի այնպիսի միջավայր, որում հնարավոր է շարժվել առաջ կառուցողական, հնարավոր է նաև՝ փոխվստահության մթնոլորտում: Հուսանք չափավոր լավատեսության այս դինամիկան կպահպանվի:
Վլադիմիր ԿԱՐԱՊԵՏՅԱՆ
Հայ ազգային կոնգրեսի վարչության անդամ, ՀԱԿ արտաքին հարաբերությունների հանձնաժողովի նախագահ
