«Դատավորների հայտարարագրերը ստուգելը, սեփականության ձեռքբերումը ստուգելը լուրջ եւ երկար գործողությունների շղթա է: Բարդ է այսօր կանխատեսել, որ դա կբերի արդյունքի: Կարծում եմ՝ ընտրություն կատարելիս է պետք այս կամ այն պաշտոնյայի ողջ կենսագրականն ուսումնասիրել: Կամ, նոր դատավոր նշանակելիս է պետք այդ ամենը հաշվի առնել»,-Aravot.am-ի հետ զրույցում անդրադառնալով «վեթինգի» սպասվելիք գործընթացին, ասաց Դեմոկրատական կուսակցության նախագահ Արամ Սարգսյանը:
«Եթե համակարգում կան օրինախախտներ, պետք է պատժել օրենքին համապատասխան, բայց ինչո՞ւ են հիմա բոլորին դարձրել մեղավոր: Կանխավ բոլորը կասկածի տակ են, որ կարող է պատահի՝ նրանք անազնիվ են: Ուստի կարծում եմ, որ ճանապարհը ճիշտ չէ ընտրված: Դա ավելորդ լարվածության է բերելու»,-կարծիք հայտնեց Արամ Սարգսյանը:
Նա համոզված է՝ եթե իսկապես «վեթինգի» կարիք կա, ապա այսօր այն պետք է փորձել իրականացնել գործող օրենքներին համապատասխան. «Եթե հիմա համատարած բոլորին ստուգեն, դա արդյունքի չի բերելու: Հանրությունում լարվածություն կառաջանա: Պատկերացրեք, որ պետք է գաք տուն ու ասեք, թե այսինչ բանը ձեզ որտեղից: Կաշառք վերցնելիս եւ օրենք խախտելիս էր պետք այդ ամենը կանխել»:
Լուիզա ՍՈՒՔԻԱՍՅԱՆ
