ՀՀ ԱԺ ԲՀԿ խմբակցության պատգամավոր Գևորգ Պետրոսյանը ՀՀ Ազգային ժողովի յոթերորդ գումարման երրորդ նստաշրջանի առաջին նիստին ներկայացրեց ՀՀ քրեական օրենսգրքում լրացում կատարելու օրենքի նախագիծը: Նա հայտարարեց՝ ՀՀ պետականության և մեր ժողովրդի գլխին կախված ամենավտանգավոր երևույթներից մեկը ոչ ավանդական սեռական կողմնորոշումը և ոչ ավանդական սեռական հարաբերությունների վտանգն է: Պատգամավորը հայտարարեց. «Այս վտանգը կանխելու նկատառումով մեր խմբակցությունը հեղինակել է նախագիծ՝ համաձայն որի քրեական օրենսգրքում լրացում պիտի կատարվի, որով քրեական պատասխանատվություն կսահմանվի 16 տարեկանը չլրացած անձանց շրջանում սեռական ոչ ավանդական կողմնորոշում քարոզելու համար»:
Պատգամավորը տեղեկացրեց, որ ՀՀ կառավարությունը բացասական եզրակացություն է տվել նախագծին՝ հիմնականում պատճառաբանելով, թե պարզ չէ՝ ինչ է ոչ ավանդական սեռական կողմնորոշումը: Այնուհետև հարցրեց. «Այստեղ կա՞ մի մարդ, որը չի հասկանում՝ ինչ է ավանդական սեռական կողմնորոշումը, ինչը ոչ ավանդականը: Մյուս հիմնավորումն այն է, որ կառավարությունն ասում է՝ այդ հանցակազմը կա արդեն քրեական օրենսգրքում: Կառավարությունը կարո՞ղ է նույնացնում է համասեռամոլության քարոզն անառակաբարո գործողությունների և պոռնկաբարո նյութեր տարածելու հետ: 2013-ից ՌԴ-ում արդեն կա այս հանցակազմը՝ ոչ ավանդական սեռական կողմնորոշում քարոզելը: Ռուսաստանը վեց տարուց ավելի է հասկացել է, թե ինչ է դա, մենք չենք հասկացել»:
ՀՀ ԱԺ Պետական-իրավական հարցերի մշտական հանձնաժողովի անդամ, ՀՀ ԱԺ Իմ քայլը խմբակցության պատգամավոր Սուրեն Գրիգորյանը, ներկայացնելով հանձնաժողովի դիրքորոշումն, այսպիսի կարծիք հայտնեց. «Անձի սեռական կողմնորոշումներն ավանդույթներից կախված չեն, սեռական կողմնորոշումը հազարամյակներ ոնց եղել է, այդպես էլ մնացել է: Նշված հանգամանքները հաշվի առնելով՝ կոչ եմ անում դեմ քվեարկել այս հարցը նիստերի օրակարգ ներառելուն»:
Կարդացեք նաև
Գևորգ Պետրոսյանն արձագանքեց՝ հազարամյակներ առաջ այսպիսի ակտիվություն, ինչպես հիմա սեռական կողմնորոշման հետ կապված չի եղել: Նա նշեց, որ ՌԴ-ում ավելի խիստ սանկցիա է նախատեսվում, այդ թվում վարչական պատասխանատվություն, իսկ Իրանում կախաղան են հանում: ՀՀ ԱԺ նախագահ Արարատ Միրզոյանն էլ միջամտեց՝ էդ կարգի մարդիկ միշտ էլ ակտիվ են եղել. ապացույցը՝ Հոմերոսից մինչև պարսկական պոեմներ:
Նախագիծը չընդգրկվեց ՀՀ ԱԺ լիագումար նիստի օրակարգում: Պատգամավորների մեծամասնությունը դեմ քվեարկեց:
Տաթև ՀԱՐՈՒԹՅՈՒՆՅԱՆ
