Անծանոթ անվանը մի խաբվեք, իրականում ֆրանսիական խոհանոցի այս նմուշը՝ ֆրիկասեն, շատ պարզ եւ համեղ ուտելիք է: «Ֆրիկասե» է կոչվում նաեւ պատրաստման եղանակը, երբ միսը, հիմնականում՝ հավի, սկզբում տապակվում է, ապա շոգեխաշվում է, գլխավորապես՝ սպիտակ թանձրուկի մեջ:
Անհրաժեշտ մթերքները
Հավի կրծքամիս- 1կգ
Բրոկոլի- 0,5 կգ
Կարդացեք նաև
Դդմիկ- 0,5 հատ
Սխտոր-3 պճեղ
Աղ, սեւ եւ կարմիր պղպեղ- ըստ ճաշակի
Ալյուր- 2 ճաշի գդալ
Բուսական յուղ- 3 ճաշի գդալ
Սպիտակ գինի-100 գրամ (պարտադիր չէ)
Կաթնասեր-100 գրամ
Թթվասեր-300 գրամ
Պատրաստման եղանակը
Հավի կրծքամիսը լավ լվանալ, եթե ոսկորով է, ոսկորից զատել: Լավ չորացնել եւ կտրատել հավասարաչափ, ոչ խոշոր կտորների: Աղ եւ պղպեղ անել, կարող եք ավելացնել ձեր նախընտրած համեմունքները, չորացրած կանաչիները: Թողնել համեմվի մոտ կես ժամ: Կարող եք նաեւ սառնարանում պահել 1-2 օր:
Թավան լավ տաքացնել, ավելացնել բուսայուղը, լցնել հավի կտորները: Թողնել լավ տապակվի, պարբերաբար շուռ ու մուռ տալով, որ բոլոր կողմերը հավասարաչափ եփվեն, մի թեթեւ կարմրեն:
Ավելացնել մանր կտրատած սխտորը: Ապա ավելացնել ալյուրը, լավ խառնել, թողնել մի քանի րոպե, որպեսզի ալյուրը եփվի: Բանջարեղենը լավ լվանալ: Բրոկոլիի ծաղկաբույլերը առանձնացնել, դնել մի կողմ, իսկ պոչի մասը կեղեւահան անել, կտրատել, դդմիկը նույնպես ձողիկներով կտրատել, ավելացնել հավին, թողնել մի քանի րոպե տապակվի: Ավելացնել սպիտակ գինին, որից հետո բրոկոլիի ծաղկաբույլերը: Ավելացնել թթվասերն ու կաթնասերը, եթե հարկ կա՝ էլի սեւ պղպեղ, աղ, խառնել, կափարիչով փակել, թողնել 5-7 րոպե շոգեխաշվի:
Կարող եք մատուցել խաշած բրնձի հետ:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
