Մի շարք զարգացած երկրների ՏՏ ոլորտի նախարարներ, փոխնախարարներ, աշխարհում հայտնի մասնագետներ այսօր մեծ հետաքրքրությամբ շրջեցին Մերգելյան ինստիտուտի «Երեւան Էքսպո» կենտրոնում տեղի ունեցող Դիջիթեք ԷՔՍՊՈ ցուցահանդեսում: Ի թիվս այլ տաղավարների, որտեղ ցուցադրված էին հայկական ընկերությունների արտադրանքը, հյուրերը ծանոթացան նաեւ երեխաների նորարարություններին:
Մարզերի ու Երեւանի Արմաթ լաբորատորիաների սաները հյուրերին պատմեցին՝ ինչ հնարավորություններ ու առավելություններ ունեն անօդաչու թռչող սարքը, նորարարական եղանակով աշխատող ջերմոցը, եղանակը կանխատեսող ապարատը եւ այլ սարքավորումներ:
ՏՏ ոլորտի մասնագետները Հայաստան են ժամանել հոկտեմբերի 6-8 մեր երկրում տեղի ունեցող WCIT 2019 համաշխարհային համաժողովին մասնակցելու:
Կարդացեք նաև
Գեղարքունիքի մարզի Այգուտ գյուղի դպրոցի սաներն իրենց ստեղծած սարքով կարողանում են եղանակը կանխատեսել, սնդիկի սյունը, անձրեւների հաճախականությունն ու օդի աղտոտվածության աստիճանը որոշել: Ասում են՝ օդերեւութաբան Գագիկ Սուրենյանի «գործին չեն խփի», քանի, որ իրենց սարքը տարածքի մասշտաբով է կանխատեսում անում:
Երեւանի Ղողանջ վարժարանի սաները անօդաչու թռչող սարք են ստեղծել: Տեսնելով սարքը նախարարները մի քանի րոպե կանգ առան՝ երեխաներից մանրամասներ ճշտելու՝ քանի՞ կիլոմետր շառավղով է թռչում այն, ինչ հնարավորություններ ունի եւ այլն:
Ալեքսանդր Մնացականյանը բացատրեց, որ, եթե եղանակն անձրեւային չէ, թռչող սարքը, մեկուկես կիլոմետր հեռավորությամբ կառավարվում է:
Միքայել Հովհաննիսյանի խոսքով, համագործակցության որոշ առաջարկներ արդեն ստացել են:
Գեղարքունիքի մարզի Գանձակ գյուղի դպրոցի Արմաթ լաբորատորիայի սաները դպրոցի զանգն էին նորարարական դարձրել: Զանգը կհնչի 45 րոպեն մեկ՝ ավտոմատացված եղանակով: Այն նաեւ որպես զարթուցիչ կարող են օգտագործել, որը երկուշաբթիից ուրբաթ առավոտյան ութին կարող է դպրոցականներին արթնացնել:
Լուսինե ԲՈՒԴԱՂՅԱՆ
