Այսօր Շուշիում «Ազատ Հայրենիք» կուսակցության նախագահ, Արցախում նախագահական առաջիկա ընտրություններին նախագահի թեկնածու Արայիկ Հարությունյանից լրագրողները հետաքրքրվեցին, թե ի՞նչ կարծիք ունի օրերս ՀՀ 3-րդ նախագահ Սերժ Սարգսյանի հայտարարության մասին, եւ Արցախի ժողովուրդն ի՞նչ կարծիք ունի այդ մասին:
«Ժողովրդի կարծիքը ժողովրդին հարցրեք, ժողովրդի հետ իմ հանդիպումներն երբեւէ այդ օրակարգով չի եղել եւ չեմ էլ հարցրել: Չեմ ուզում մեկնաբանել ամեն մի ասած, թե՝ ինչ նկատի ուներ: Այն, որ արդարադատության համակարգի բարեփոխումները այսօր դժվար, ինչ-որ տեղ դիմադրությամբ, բայց առաջ է գնում, եւ համոզված եմ՝ որեւէ մեկը Հայաստանի Հանրապետությունում անհիմն չի ձերբակալվելու եւ անհիմն չի պատժվելու»,-ասաց Հարությունյանը:
Հիշեցնենք, Սերժ Սարգսյանն իրեն ձերբակալելու մասին լուրերին արձագանքել է. «Եթե ինձ ձերբակալելով մեր ժողովուրդը գոհ ու երջանիկ կլինի, եթե ինձ ձերբակալելով մարտի 1-ը, հոկտեմբերի 27-ը կհամարվեն ամբողջովին բացահայտված, եթե ինձ ձերբակալելով մեր երկրին սպառնացող վտանգները կչեզոքանան, եթե ինձ ձերբակալելով Լեռնային Ղարաբաղի բանակցությունները կվերադառնան ճիշտ ուղի, ապա թող ձերբակալեն»:
Նելլի ԲԱԲԱՅԱՆ
