Դատարանն այսօր որոշեց 5 միլիոն դրամ գրավի դիմաց ազատ արձակել Երևանի Դավթաշեն վարչական շրջանի նախկին ղեկավար Ռուսլան Բաղդասարյանին:
Դատախազությունը Բաղդասարյանին կալանավորելու միջնորդություն էր ներկայացրել: Նախկին թաղապետի պաշտպան Լեւոն Անանյանը Aravot.am-ին ասաց, որ իր պաշտպանյալը չի ընդունում առաջադրված մեղադրանքը եւ այն պայմանավորում է իր քաղաքական հայտարարություններով ու իշխանությանը քննադատելու հանգամանքով:
Հիշեցնենք, որ Ոստիկանության փոխանցմամբ՝ նախապատրաստված նյութերով պարզվել է, որ Դավթաշեն վարչական շրջանի նախկին ղեկավարի աշխատակազմում 2009-ից մինչև 2018 թվականն ընկած ժամանակահատվածում տարբեր հաստիքների են հրամանագրվել, բայց փաստացի աշխատանքի չեն հաճախել վարչական շրջանի նախկին ղեկավարի մտերիմները։ Հրամաններով և աշխատանքային պայմանագրով նախատեսված պարտականությունները չկատարելու պարագայում նրանց անվամբ դուրս է գրվել ընդհանուր 41 միլիոն 720 հազար 929 դրամ աշխատավարձ, որը վատնման եղանակով հափշտակվել է։
«Գտնում ենք, որ մեղադրանքի առաջադրումը վաղաժամ է, խորությամբ քննություն պետք է տարվի »,- ասաց Լեւոն Անանյանը:
Կարդացեք նաև
Փաստաբանի խոսքով՝ քրեական գործի ողջ ծավալն իրեն դեռ հասու չէ, բայց այնքանով, որքանով ծանոթացել է, գործում իր պաշտպանյալի դեմ գրեթե ցուցմունք չկա: Անդրադառնալով մեղադրանքի այն դրվագին, ըստ որի որոշ հաստիքներով նախատեսված աշխատանքը չի արվել,աշխատակիցները աշխատանքի չեն գնացել՝ փաստաբանն ասաց, որ այդ աշխատակիցներն այլ աշխատանք են արել հօգուտ վարչական շրջանի: Ինչ վերաբերում է Դավթաշեն բարեգործական հիմնադրամի հոգաբարձուների խորհրդի նախագահ եղած տարիներին հիմնադրամի ֆինանսական միջոցների չարաշահումներին՝ փաստաբանն ասաց՝ դեռ զերծ կմնա մեկնաբանություններ անելուց:
Հիշեցնենք, որ Ոստիկանության հաղորդագրությունում ասվում էր՝ վարչական շրջանի նախկին ղեկավարի բանավոր հրահանգով համայնքապետարանի տարբեր աշխատակիցներին ու վարչական շրջանի բնակիչներին ֆինանսական օգնություն տրամադրելու վերաբերյալ կազմվել ու ստորագրվել են կեղծ փաստաթղթեր: Այսպիսով՝ 2012-2014 թվականների ընթացքում հափշտակվել է 9 միլիոն դրամից ավելի գումար:
Արփինե ՍԻՄՈՆՅԱՆ
