ՀՀ ԱԺ ֆինանսավարկային եւ բյուջետային հարցերի մշտական հանձնաժողովը Մանե Թանդիլյանի նախագահությամբ նոյեմբերի 26-ին հրավիրած նիստում առաջին ընթերցմամբ քննարկել է «Բանկային գաղտնիքի մասին» ՀՀ օրենքում փոփոխություն կատարելու մասին» օրենքի նախագիծը։
ՀՀ ԿԲ նախագահի տեղակալ Ներսես Երիցյան նշել է, որ առաջարկվում է ուժը կորցրած ճանաչել օրենքի այն դրույթը, որը Կենտրոնական բանկին իրավասություն էր տալիս հրապարակելու անպարտաճանաչ պարտատերերի անունները/ անվանումները:
Քննարկման արդյունքում նախագիծը ստացել է դրական եզրակացություն: Առաջարկվել է այն ընդգրկել ԱԺ 7-րդ գումարման երրորդ նստաշրջանի եւ առաջիկա հերթական նիստերի օրակարգերի նախագծերում:
Երկրորդ ընթերցմամբ քննարկվել եւ դրական եզրակացություն է ստացել «Հաշվապահական հաշվառման մասին» եւ կից նախագծերի փաթեթը, որով սահմանվում են հաշվապահական հաշվառում կազմակերպելու եւ վարելու, ընդհանուր նշանակության ֆինանսական հաշվետվություններ պատրաստելու եւ ներկայացնելու միասնական հիմունքները, ինչպես նաեւ փորձ է արվում կարգավորել հաշվապահական հաշվառմանը վերաբերող այլ հարաբերություններ։
Կարդացեք նաև
Օրինագծերի փաթեթը հանձնաժողովի առաջարկությամբ կընդգրկվի ԱԺ առաջիկա հերթական նիստերի օրակարգի նախագծում:
ՀՀ ԱԺ բյուջետային գրասենյակի համակարգող փորձագետ Գագիկ Բարսեղյանը ներկայացրել է հաշվետվություն՝ 2019 թվականի երրորդ եռամսյակում կատարած աշխատանքների վերաբերյալ։ Ըստ նրա՝ Բյուջետային գրասենյակը հաշվետու ժամանակահատվածում ստացած 11 հարցումներին ի պատասխան՝ պատրաստել եւ ՀՀ ԱԺ նախագահին, նրա տեղակալներին, մշտական հանձնաժողովներին, խմբակցություններին ու պատգամավորներին է տրամադրել 118 տեսակի տեղեկանքներ։
Մշտական հանձնաժողովը որոշում է կայացրել նոյեմբերի 29-ին հրավիրել խորհրդարանական լսումներ՝ «Վարկային քաղաքականությունը եւ ֆինանսական գրագիտության խնդիրները Հայաստանում» թեմայով։
ՀՀ Ազգային ժողով
