«Մեդիա պաշտպանի» նախաձեռնությամբ այսօր քննարկվում էին «Հեռուստատեսության եւ ռադիոյի մասին» նոր օրենքի սկզբունքները:
Հիշեցնենք, օրենքի մի նախագիծ մշակվեց, որը քննարկումների արդյունքում դուրս եկավ շրջանառությունից, քանզի ըստ այդ նախագծի՝ բոլոր մասնավոր հեռուստաընկերությունները պետք է դուրս գային հանրային մուլտիպլեքսորից, մնար միայն Հանրային հեռուստաընկերությունը՝ իր 5 ալիքով: Նախագծի քննարկումներում`դրա շրջանառությունից դուրս գալը «Մեդիա պաշտպան» նախաձեռնության համակարգող Աղասի Ենոքյանը համարում է դրական:
Աղասի Ենոքյանը ցանկանում է, որ հաջորդ նախագծում երկու սկզբունք ամրագրվի`խոսքի ազատությունը պահպանվի եւ հեռուստատեսությունները մնան որպես բիզնես:
Ժուռնալիստների միության նախագահ Սաթիկ Սեյրանյանն անիմաստ համարեց «մերժված» նախագծի քննարկումներն առհասարակ, քանի որ ներկայացված նախագիծը շչջանառության մեջ էր դրվել առանց շահագրգիռ կողմերի հետ նախապես քննարկելու, առանց խնդիրների ուսումնասիրության: «Մերժված» նախագծի լավ կողմն, ըստ բանախոսի, այն էր, որ նման նախագծի գոյության արդյունքում ձեւավորվեց վերգետնյա հեռարձակողների ասոցիացիա:
Կարդացեք նաև
Սաթիկ Սեյրանյանը մի քանի պատճառ է նշում, թե ինչո՞ւ «մերժված» նախագիծը չէր կարելի ընդունել. առաջինն այն է, որ Հանրային հեռուստաընկերությունը հսկայական կառույց էր դառնում, ինչ նաեւ շատ թանկ է նստում պետության վրա:
Այլ մանրամասները` տեսանյութում
Ավելի ուշ քննարկմանը միացած ԱԺ պատգամավոր Վահագն Թեւոսյանն ասաց, որ նոր նախագիծ է կազմվում, հունվար ամսին շահագրգիռ հանրության հետ քննարկումները կսկսվեն: Նա պարզաբանեց, որ «մերժված» նախագիծը մի փոքր հապճեպ է շրջանառվել, բայց քննարկումների արդյունքում բավականին բացեր հասկանալի են դարձել եւ առաջիկայում նկատի կառնվեն: Նա տեսականորեն չբացառեց, որ «մերժված» նախագիծը հիմք ընդունվի, 70-80 տոկոսով փոփոխվի: Ասում է` կարեւորը դաշտը կարգավորելու քաղաքական կամք կա:
Նելլի ԳՐԻԳՈՐՅԱՆ
