«Կարեւոր է, որ ԱՄՆ օրենսդիր մարմինն ամբողջությամբ ճանաչել եւ դատապարտել է Հայոց ցեղասպանությունը: Մնում է, որ գործադիր իշխանությունն էլ հետեւի օրենսդիրի կամքին, ինչը, կարծում եմ, ժամանակի հարց է»,-լրագրողների հետ զրույցում այսօր անդրադառնալով ԱՄՆ սենատի ընդունած՝ Հայոց ցեղասպանությունը ճանաչող բանաձեւին, ասաց «Լուսավոր Հայաստան» կուսակցության առաջնորդ Էդմոն Մարուքյանը: Նա շեշտեց, որ բանաձեւը չունի իրավական ուժ, փոխարենը՝ ունի քաղաքական նշանակություն:
«Թրամփն այն նախագահն է, որը երբեք չի խոսել ցեղասպանության ճանաչման մասին, բայց նրա օրոք Սենատն ընդունեց Հայոց ցեղասպանությունը: Սա հետաքրքրական հանգամանք է: Գործող նախագահն արդեն կարող է հետեւել այդ բանաձեւին»,-համոզմունք հայտնեց Էդմոն Մարուքյանը:
Նրա խոսքով՝ հավանական է, որ ապրիլին ԱՄՆ նախագահ Դոնալդ Թրամփը, որը, ըստ Մարուքյանը, կվերընտրվի, կօգտագործի ցեղասպանություն տերմինը. «Բայց օգտագործելու դեպքում էլ հարց կառաջանա՝ հետո՞ ինչ: Ուստի պետք չէ ձեւավորել օրակարգ, որը հանրության շրջանում հարցեր է առաջացնում: Սա գործընթաց է, որով աշխարհում հասնում ենք Հայոց ցեղասպանության անբեկանելիության փաստին»:
Լուիզա ՍՈՒՔԻԱՍՅԱՆ
