Դեկտեմբերի 23-ին աշխարհահռչակ դաշնակահար Խատիա Բունիաթիշվիլին առաջին անգամ հանդես կգա Հայաստանի ազգային ֆիլհարմոնիկ նվագախմբի (ՀԱՖՆ) հետ` Էդուարդ Թոփչյանի ղեկավարությամբ: Համերգը կկայանա «Արամ Խաչատրյան» համերգասրահում: Ինչպես Aravot.am-ի հետ զրույցում նշեց շվեյցարաբնակ ճանաչված մեցցո սոպրանո, Ժնեւի «Ավետիս» մշակութային կազմակերպության հիմնադիր եւ նախագահ Վարդուհի Խաչատրյանը, սա Խատիա Բունիաթիշվիլիի հետ «Ավետիսի» հինգերորդ համագործակցությունն է:
«Խատիան բազմիցս մասնակցել է մեր համերգներին եւ ամեն անգամ կատարել հայ կոմպոզիտորների ստեղծագործություններ, մենք բարեկամական հարաբերություններ ունենք նրա հետ եւ առաջիկայում՝ լուրջ ծրագրեր: Այս համատեքստում մենք չէին կարող շրջանցել Հայաստանը եւ չներկայացնել Խատիային հայ ունկնդրին»,-ասաց Վարդուհի Խաչատրյանը:
«Շատ ուրախ ենք, որ Ֆիլհարմոնիկը միացավ մեզ եւ վերջապես կարողացանք բոլորիս հարմար օր ընտրել համերգի համար: Ի դեպ, այդ օրը գտնելը շատ դժվար էր»,-հավելեց մեր զրուցակիցը:
Կարդացեք նաև
Նա նաեւ հայտնեց, որ Խատիա Բունիաթիշվիլիի հետ համագործակցությունը շարունակական է լինելու: Մասնավորապես 2020 մայիսի 21-ին «Ավետիսը» կազմակերպելու է նրա համերգը Նյու Յորքի Քարնեգի Հոլում, ապա առաջիկայում Ժնեւում կստեղծվի Խատիա Բունիաթիշվիլիի անվան փառատոն, որտեղ ՀԱՖՆ-ի մասնակցությունն են ակնկալում՝ որպես փառատոնի ռեզիդենտ նվագախումբ: Ինչ վերաբերում է Քարնեգի Հոլում կայանալիք համերգին, այն Վարդուհի Խաչատրյանի խոսքով, առանձնահատուկ է նրանով, որ հենց հայկական կազմակերպությունն է համերգի նախաձեռնողն ու կազմակերպիչը:
Գոհար ՀԱԿՈԲՅԱՆ
Լուսանկարները տրամադրել է Վարդուհի Խաչատրյանը
