Շատ համեղ ուտեստ է: Թեթեւակի տապակած սպանախը, սխտորն ու ընկույզը շատ լավ համադրվում են հավի կրծքամսի հետ: Այս ուտեստը կարելի է մատուցել նաեւ տոնական սեղաններին:
Անհրաժեշտ մթերքները
Հավի ոսկրահան կրծքամիս- 4 հատ
Համեմունքներ- ըստ ճաշակի (ես օգտագործել եմ աղ, սեւ եւ կարմիր պղպեղ, չորացրած սխտոր, հազրեվարդ, ծիթրոն)
Կարդացեք նաև
Ձիթապտղի յուղ- 1 ճաշի գդալ
Սպանախ-2 կապ
Պրաս (կամ «բուլղարական սոխ»)- կես հատ (կարող եք փոխարինել սովորական գլուխ սոխով)
Սխտոր-2 պճեղ
Չորալոլիկ (լոլիկի չիր)- 8 հատիկ (պարտադիր չէ)
Ընկույզ (կարող եք վերցնել ինչպես սովորական ընկույզ, այնպես էլ՝ հնդկական ընկույզ, նուշ, կաղին կամ մայրու ընկույզ)- մի բուռ
Բուսական յուղ-4 ճաշի գդալ
Կարագ-50 գրամ
Դեղին, պինդ պանիր (օրինակ՝ գաուդա)-8 բարակ շերտ
Պատրաստման եղանակը
Հավի կրծքամիսը մեջտեղից կիսել՝ չանջատելով իրարից, որպեսզի դառնա ավելի լայն կտոր: Համեմել աղով, պղպեղներով, չորացրած կանաչիներով, չորացրած կամ թարմ, ճզմած սխտորով, վրան ցողել ձիթապտղի յուղը: Բոլոր կտորները համեմելուց հետո ծածկել պոլիէթիլենային թաղանթով, դնել սառնարան: Կարող եք սառնարանում պահել մինչեւ 3 օր:
Սպանախը մաքրել, լավ լվանալ: Սոխը նույնպես շատ լավ լվանալ (պրասի տերեւների արանքներում միշտ հող է լինում, ուշադիր եղեք):
Թավայի մեջ տաքացրեք բուսական յուղը, ցածրացրեք կրակը: Սկզբում լցրեք կտրատած սոխը, մեկ-երկու րոպեից ավելացրեք շերտատած սխտորը, կտրատած չորալոլիկը, ընկույզը, խառնեք, թողեք մի փոքր էլ տապակվի, ավելացրեք կտրատած սպանախը: 3-4 րոպեն լրիվ բավական է, որ սպանախը տապակվի, ծավալը փոքրանա: Հենց բանջարեղենը տապակվի վերջանա, ավելացրեք աղ, մի քիչ սեւ պղպեղ, կարագ եւ անջատեք, թողեք հովանա:
Մինչ բանջարեղենը հովանում է, շերտ-շերտ կտրատեք պանիրը: Հավի կրծքամիսը բացեք գրպանիկի ձեւով, դրեք մի կտոր պանիր, մի գդալ տապակած սպանախ, վրայից հաջորդ կտոր պանիրը, փակեք «գրպանիկը» եւ ամրացրեք փայտե չոփիկներով:
Գրիլ թավան տաքացրեք, հավի կտորները 3-ական րոպեով տապակեք երկու կողմից:
Վերցրեք խորը, հրակայուն աման, հավի թեթեւակի տապակված կտորները դրեք մեջը, վրայից լցրեք ավելացած սպանախը ու դրեք 200 աստիճանով նախապես տաքացրած ջեռոցը 10-15 րոպեով:
Անջատեք, թողեք ջեռոցում մնա եւս 10 րոպե եւ մատուցեք տաք վիճակում: Որպես խավարտ կարող եք մատուցել բրինձ, թարմ բանջարեղեն:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
