Նիդերլանդների Ուտրեխտի համալսարանի գիտնականները կարողացել են սինթեզել մոնոկլոնալ հակամարմին (47D11), որը կարող է չեզոքացնել կորոնավիրուսի վարակը լաբորատոր պայմաններում, գրում է Nature Communications-ը:
Տեղեկատվության համաձայն՝ ուսումնասիրությունն իրականացրել են հոլանդացի և գերմանացի գիտնականները: Ուսումնասիրության արդյունքում պարզվել է, որ չեզոքացնող հակամարմինը կարող է կանխել և բուժել COVID-19-ը: Մոնոկլոնալ հակամարմինները լաբորատորիայում ստեղծված սպիտակուցներ են, որոնք նման են մարդու իմունային բջիջների արտադրած սպիտակուցներին: Գիտնականների խոսքով՝ ստեղծված հակամարմինը «չեզոքացնում է SARS-CoV-ը և SARS-CoV-2-ը դեռևս անհայտ մեխանիզմի միջոցով»:
Փորձի շրջանակներում համակամարմինը ստուգվել է գենետիկորեն մոդիֆիկացված մկների վրա: Պարզվել է, որ 47D11 հակամարմինը չեզոքացնող ակտիվություն է ցուցաբերում: Այնուհետև հետազոտողները վերափոխել են հակամարմինը, որպեսզի ստեղծեն մարդու համար նախատեսված տարբերակը։ Նշվում է, որ 47D11 հակամարմնի օգտագործումը բժշկության մեջ դեռևս անհնարին է, քանի որ անհրաժեշտ է անցկացնել մի շարք փորձարկումներ:
Վիկտորյա ԱՆԴՐԵԱՍՅԱՆԸ
