Օրերս «Իմ քայլը» խմբակցության պատգամավոր Գայանե Աբրահամյանը ԱԺ-ում ելույթ ունեցավ՝ հիշեցնելով մանկապիղծ Սերոբ Տեր-Պողոսյանի գործը: Այդ ժամանակ ԱԺ դռների մոտ ցույց էին անում՝ ընդդեմ «Սեռական շահագործումից եւ սեռական բնույթի բռնություններից երեխաների պաշտպանության մասին» Լանզարոտի կոնվենցիայի, որը մանկապղծության դեմ է: Գայանե Աբրահամյանն ասաց. «Լավ կլիներ, որ ակցիաներ անեիք Ախթալայում, որտեղ տասնյակ, 22 դեպքով եղավ դատարանի վճիռ, բայց մենք չգիտենք, կարող է հարյուրավոր տղաներ բռնաբարվում էին մանկապիղծ Սերոբ Տեր-Պողոսյանի կողմից: Իհարկե, մանկապիղծ մեծահարուստի դեմ համարձակություն չունեիք բողոքելու, քանի որ նա ոչ միայն մեծահարուստ էր, այլ նաեւ ձեր սիրելի նախկին վարչապետի խորհրդականը»:
Գայանե Աբրահամյանն ասաց, որ նախկիններն այդ կոնվենցիան վաղուց ստորագրել էին, բայց չէին վավերացրել, որովհետեւ նրանց վարչապետի խորհրդականը հենց ինքը մանկապիղծ էր, որովհետեւ մանկատներից ու ծննդատներից երեխաներ էին վաճառվում:
Հիշեցնենք, որ այն օրերին, երբ մանկապիղծ Սերոբ Տեր-Պողոսյանին մեղադրանք էր առաջադրվել, ԱԺ նախկին պատգամավոր Վիկտոր Դալլաքյանը հայտարարությունների ժամին ներկայացրել էր վիճակագրական տվյալներ. օրինակ, 2009 թվականին անչափահասների նկատմամբ սեռական ոտնձգությունների համար 18 դատական ակտերից միայն 3-ի դեպքում էր նշանակվել ազատազրկում, իսկ մյուս դեպքերում սահմանվել է տուգանք։ Իսկ տարեկան, ըստ Դալլաքյանի, սեռական բռնության են ենթարկվել ավելի քան 100 անչափահասներ:
Չնայած Գայանե Աբրահամյանն իր ելույթում հիշատակեց Սերոբ Տեր-Պողոսյանի եւ Նուբարաշենի հատուկ դպրոցի գործերը, բայց սրանց համեմատ Հարթաշենի գյուղապետի գործն ավելի մութ կետեր ունի՝ պատժի կրման առումով: Սերոբ Տեր-Պողոսյանին դեռ դատական ակտով ամենախիստ պատիժը տվեցին՝ 15 տարի ազատազրկում ու նա մահացավ պատիժը կրելու ընթացքում:
Կարդացեք նաև
«Հետքի» մեկ այլ հրապարակումից հետո բացահայտվեց մի անչափահաս աղջկա բռնաբարության գործով ամբաստանյալ, Հարթաշենի գյուղապետ Ազատ Ղուկասյանի իրականացրած մանկապղծության դեպքը, որը կատարվել էր հետեւյալ կերպ. Ազատ Ղուկասյանը ոստիկանություն տանելու պատրվակով իր մեքենան է նստեցրել հարեւանների կողմից գողության մեջ մեղադրվող, այդ ժամանակ 9-րդ դասարանի 15-ամյա աշակերտուհի Ա.-ին, սակայն ճանապարհին կանգնեցրել է ավտոմեքենան և ոստիկանություն չտանելու պայմանով ստիպել վերջինիս սեռական հարաբերության մեջ մտնել իր հետ:
Այս գործով Հարթաշենի գյուղապետին Սյունիքի մարզի ընդհանուր իրավասության դատարանը դատապարտել էր 8 տարի ազատազրկման: Սակայն որոշ ժամանակ անց փաստաբան Կարեն Մեժլումյանին էին դիմել Հարթաշենի բնակիչները: Նա գրառում էր արել՝ նշելով, որ Ազատ Ղուկասյանի արարքը որակվել է ՀՀ քրեական օրենսգրքի 140 հոդվածով (սեռական հարաբերության հարկադրելը շանտաժի միջոցով), որը մինչև 3 տարի ազատազրկում է նախատեսում:
Ավելին՝ «Համաներում հայտարարելու մասին» ՀՀ ԱԺ որոշման 6-րդ կետի 2-րդ ենթակետին հղումով, որի համաձայն՝ պետք է կարճվեն այն գործերը, որոնցով անձինք մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ՝ ոչ ավելի, քան երեք տարի ժամկետով ազատազրկում, Ազատ Ղուկասյանին ազատ են արձակել:
Կարեն Մեժլումյանն այս առումով իր զարմանքն է հայտնել. «Նրա նկատմամբ 21.01.2013թ. որոշմամբ համաներում է կիրառվել, ու գործի վարույթը կարճվել է: Ի՞նչ է ստացվում, երբ 16 տարին չլրացած տղա երեխային գումար են տալիս եւ հետը սեռական բնույթի հարաբերություն ունենում կամ համասեռամոլությամբ զբաղվում, դա համարվում է անօգնական վիճակի օգտագործում, սակայն երբ նույն տարիքի աղջիկ երեխային ոստիկանություն տանելու սպառնալիքով բնակավայրից դուրս, գիշերով ստիպում են սեռական հարաբերություն ունենալ, դա չի՞ համարվում անօգնական վիճակի օգտագործում»:
Հռիփսիմե ՋԵԲԵՋՅԱՆ
