Երեւանի ընդհանուր իրավասության դատարանում հուլիսի 15-ին նշանակված Սահմանադրական դատարանի նախագահ Հրայր Թովմասյանն ընդդեմ ՀՀ վարչապետ Նիկոլ Փաշինյանի գործով դատական նիստը (նախագահող դատավոր Գայանե Խաչատրյան) կրկին հետաձգվեց: Պատասխանողի ներկայացուցիչ Գևորգ Գյոզալյանը միջնորդել էր դատարանին նիստը հետաձգել, քանի որ գտնվում է հերթական արձակուրդում:
Դատարանը միջնորդությունը բավարարեց: Նիստը հետաձգվեց: Հաջորդ դատական նիստը տեղի կունենան սեպտեմբերի 9-ին՝ ժամը 15:00-ին:
Հայցվորի ներկայացուցիչ Արթուր Հովհաննիսյանը Aravot.am-ի հետ զրույցում նիստերի հետաձգման առիթով ասաց. «Օբյեկտիվորեն երկու անգամ իմ պատճառով նիստը չի կայացել, երրորդ անգամ պատասխանողի ներկայացուցչի: Առաջին անգամ կորոնավիրուսով պայմանավորված միջնորդել եմ հետաձգել նիստը, հաջորդ անգամ առանց ինձ նիստ է նշանակվել, և նույն ժամին ավելի վաղ նշանակված այլ դատական նիստ եմ ունեցել. միջնորդել եմ նիստն այլ օր նշանակել: Այս անգամ էլ պատասխանողի արձակուրդի ժամանակահատվածի հետ համընկավ: Ենթադրում եմ՝ սեպտեմբերին նիստն, այնուամենայնիվ, տեղի կունենա»:
Հրայր Թովմասյանը պահանջում է ներողություն խնդրել վիրավորանք հանդիսացող արտահայտությունների համար և հերքել զրպարտություն հանդիսացող տեղեկությունները:
Կարդացեք նաև
Հիշեցնենք՝ Նիկոլ Փաշինյանը հայտարարել էր, որ Թովմասյանը քծնել է իրեն, իսկ երբ ապացույցներ էին ուզել, ներկայացրել էր այն հայտնի գրիչը, որը Թովմասյանը տվել էր վարչապետին:
Տաթև ՀԱՐՈՒԹՅՈՒՆՅԱՆ
