«Սաթէ-Աթղը» ֆրանսիական թատերական միությունը ապրիլի 13-19-ը հյուրախաղերով կներկայանա հայ հանդիսատեսին եւ Ֆրանկոֆոնիայի շաբաթվա շրջանակներում կներկայացնի «Սասնա Ծռեր» էպոսի հիման վրա բեմադրված երաժշտական ներկայացում, որտեղ զբաղված են տարբեր ազգերի երաժիշտ-դերասաններ: Նրանք տեքստի եւ երաժշտության միջոցով կներկայացնեն էպոսի երեք գլուխները՝ Սանասար և Բաղդասար, Մեծ Մհեր և Սասունցի Դավիթ։
Ինչպես Aravot.am-ի հետ զրույցում հայտնեց բեմադրիչ Սաթէ Խաչատրյանը, 2014թ էպոսի մեկ գլուխը` Մեծ Մհերը ներկայացրել են ընթերցանության տեսքով` երաժշտության ուղեկցությամբ, ինչը մեծ հետաքրքրություն է առաջացրել: Այնուհետեւ ձեռնամուխ են եղել ամբողջական տարբերակի կյանքի կոչմանը: «Մեր ներկայացումն ավարտվում է այն ֆանտաստիկ խոսքերով, որ Դավիթն իրականացրեց հոր երազանքը եւ ազատագրեց Սասունը: Հիմա ամեն անգամ Սասուն ասելիս ուզում եմ ասել` ազատագրեց Շուշին»,-ասաց Սաթէ Խաչատրյանը:
Սաթէ Խաչատրյան
Բեմադրիչի խոսքով, բեմի վրա 6 պատմող-ասացող դերասան,երաժիշտներ են. «Երկուսս ենք հայ` ես եւ Լիլիթ Գեղամյանը, ունենք Կոնգոյից դերասան` Ռոբբա Բիասի Բիասին, որը խաղում է Մեծ Մհերին եւ Սասունցի Դավիթին, Ռայմոնդ Պալսին Մարտինիկից է, Յաննիկ Լուին, որին հայ հանդիսատեսը ճանաչում է Թումանյանի հեքիաթներից, Գվադելուպից է, խաղում է Ձենով Օհան, եւ Մսրա Մելիք խաղացողը Ֆրանսիացի է` Պիեռ-Ամբեր Պոտիեն, որը խաղում է եւ Մսրա Մելիքին եւ կրտսեր Մելիքին` Դավիթի խորթ եղբորը: Մի խոսքով, բոլորը Ֆրանսիացիներ են, բայց տարբեր ազգերի ներկայացուցիչներ, ու յուրաքանչյուրն իր ազգային համեմունքն է բերում մեր էպոսի մեջ»:
Կարդացեք նաև
Ներկայացումը ֆրանսերեն է՝ հայերեն ենթագրերով։
Սաթէ Խաչատրյանի հարցազրույցն ամբողջությամբ` տպագիր «Առավոտում»:
Գոհար ՀԱԿՈԲՅԱՆ
