«Սյունիքի ճանապարհն անվտանգ է, անցած օրն եմ եկել։ Ճիշտ է, կանգնած են հարեւան պետության ներկայացուցիչները, բայց հայ քաղաքացիներին չեն (խոսքը կիսատ է մնում․-հեղ․)․․․»-խորհրդարանում լրագրողների հետ ճեպազրույցում այսօր ասաց ԱԱԾ պետի տեղակալ Արամ Հակոբյանը, որը եկել էր բյուջետային քննարկումներին մասնակցելու։
Պաշտոնյան չարձագանքեց հարցադրմանն այն մասին, որ քաղաքացիները պարբերաբար ահազանգում են ադրբեջանցիների կողմից իրենց կանգնեցնելու եւ ստուգելու մասին։ «Ես չունեմ նման տեղեկություններ»,-ասաց ԱԱԾ փոխտնօրենը եւ շտապեց հեռանալ։
Հիշեցնենք՝ ՀՀ ՄԻՊ-ը քանիցս ահազանգել է, որ Սյունիքի մարզում Որոտանի ճանապարհին ադրբեջանական զինված ծառայողների արարքները շարունակում են խախտել ՀՀ քաղաքացիական բնակչության ու ՀՀ-ում օրինական հիմունքներով գտնվող Իրանի քաղաքացիների իրավունքները և քրեորեն պատժելի են։
Լուիզա ՍՈՒՔԻԱՍՅԱՆ
