Aravot.am-ն այսօր Հայաստանի պետական հետաքրքրությունների ֆոնդի՝ ԱՆԻՖ-ի տնօրեն Դավիթ Փափազյանից հետաքրքրվեց՝ ե՞րբ ակնկալենք «Fly Arna» ավիաընկերության առաջին թռիչքը, ի՞նչ փուլում է գործընթացը:
Հիշեցնենք, որ այս տարվա սեպտեմբերին ԱՆԻՖ-ն ու «Էյր Արաբիա» ավիաընկերությունը հայտարարեցին համատեղ ձեռնարկության կողմից գործարկվող նոր՝ ազգային ավիաընկերության մասին, եւ որպես ընկերության անուն ընտրվեց «Fly Arna»-ն։ Այն գործելու է որպես բյուջետային ուղեւորատար ավիաընկերություն, որի բազան հանդիսանալու է Երեւանի «Զվարթնոց» միջազգային օդանավակայանը:
Դավիթ Փափազյանն ասաց, որ այս տարվա ապրիլ, մայիս ամիսներից «Fly Arna»-ն կսկսի գործել. «Այսինքն՝ ապրիլ-մայիս ամիսներից կանոնավոր, նախնական 4 ուղղություններով «Fly Arna»-ն կսկսի իրականացնել չվերթներ: Այդ ժամանակ կունենանք 2 օդանավ: Ծրագրի էտապներով օդանավերի քանակներն ու ուղղություններն ընդլայնելն է: Հինգ տարի հետո 15 օդանավ կլինի»:
Մեր հարցերին՝ վերջերս ՀՀ կառավարությունը 10 միլիոն դոլար հատկացրեց «Fly Arna» ավիաընկերությանը, եւ, եթե դա օտարերկրյա ներդրում է, ինչո՞ւ է պետությունը եւս գումար ներդնում, ո՞րն է ԱՆԻՖ-ի ստեղծման նպատակը, արդյոք կա՞ն նման օրինակներ այլ երկրներում, երբ պետությունը մասնակցում է ներդրումներին պետական ֆոնդի միջոցով, Դավիթ Փափազյանը պատասխանեց. «Ճիշտն ասած՝ մեր մանդատը չէ պիտակավորումը՝ օտարերկրյա ներդրում, թե ուրիշ պիտակավորում դրան տալ: Մեր մանդատը երկու ուղղություններով է՝ օտարերկրյա ներդրումներ ներգրավել եւ իմպլեմենտացիային հետեւելն է, եւ կապիտալի ներդրումը Հայաստանի տնտեսության, հայաստանյան ընկերությունների մեջ: Շատ հաճախ մեր երկու մանդատները խաչվում են եւ սա հենց ամենացայտուն օրինակն է, որտեղ էմիրաթական կողմը ներդնում է այդքան գումար, հայկական կողմն, ի դեմս ԱՆԻՖ-ի՝ նույնպես»:
Կարդացեք նաև
Պարոն Փափազյանն ասաց, որ տարբեր ալգորիթմներ են քննարկել եւ եկել են եզրակացության, որ ամենաբաց եւ տնտեսական մրցակցությանը վտանգ չհանդիսացող ալգորիթմն այն է, որ ներդնեն կապիտալ, եւ պետական հետաքրքրությունը ներկայացված լինի կապիտալի տեսքով այլ ոչ թե դոտացիաներով կամ արտոնություններով:
«Կարեւոր էր այն փաստը, որ Հայաստանում ստեղծվում են եւ կշարունակվեն ստեղծվել տեղական գրանցում ունեցող ավիաընկերություններ, եւ, ԱՆԻՖ-ը չի ուզում իր նեղ հարցերը լուծելով խանգարել երկրում տեղի ունեցող ավելի լայն ծրագրերի»,-ասաց ԱՆԻՖ-ի տնօրենը:
Ինչ վերաբերում է միջազգային փորձին, Դավիթ Փափազյանն ասաց, որ նոր բան չեն հնարել եւ շատ երկրներ ունեն իրենց փոխադրողները:
Լուսինե ԲՈՒԴԱՂՅԱՆ
