«Հայաստան» խմբակցության պատգամավոր Արծվիկ Մինասյանի ելույթից հետո այսօր ԱԺ լիագումար նիստում արտահերթ ելույթ ունեցավ խորհրդարանի փոխնախագահ Ռուբեն Ռուբինյանը։
«Խնդիրը բառի բուն իմաստով հանրային գիտակցությունը վիրավորելու մեջ է։ Հարց եմ տալիս ընդդիմադիրներին՝ Սանասարը, Կովսականը, Ակնան, Քաշաթաղն ի՞նչ էին։ Ի՞նչ են։ Ի՞նչ նշանակություն ունեին հայերիս, մեր համար, ՀՀ-ի եւ մեր ղեկավարների համար»,-հարցադրում արեց Ռուբինյանը։
Նրա խոսքով՝ արձանագրված փաստ է, որ ՀՀ իշխանությունը՝ Լեւոն Տեր-Պետրոսյանի, Քոչարյանի, Սարգսյանի նախագահության տարիներին բանակցել են նշյալ յոթ շրջաններն Ադրբեջանին հանձնելու շուրջ․ «Բնականաբար, ոչ միայն դրա մասին են բանակցել, դա փաթեթների եւ փուլերի բաղադրիչ էր։ Երբ ձեզանից շատերն ասում են, թե մենք հայրենիքի 75%-ը հանձնել ենք, հարց է ծագում՝ դա նշանակո՞ւմ է, որ դուք դա համարում եք Արցախի մաս։ Այո, տրամաբանորեն։ Այդ դեպքում Ռոբերտ Քոչարյանն ու Սերժ Սարգսյանն ինչպե՞ս են բանակցել հայրենիքի որոշակի տոկոսը հանձնելու շուրջ։ Դա նշանակո՞ւմ է, որ իրենք պոտենցիալ հողատու էին ձեր տրամաբանությամբ։ Այստեղ է խնդիրը։ Կողմնորոշվեք ի վերջո։ Եթե Ադրբեջանը ստորագրեր Կազանի փաստաթուղթը, եւ այդ տարածքները, որոնք Ադրբեջանին անցան պատերազմի արդյունքում, անցնելու էին, չէ՞, Ադրբեջանին ի վերջո։ Ինչո՞ւ եք վիրավորում իմ եւ ոչ միայն իմ գիտակցությունը»։
Ռուբինյանի համար հասկանալի չէ նաեւ այն, որ ըստ ընդդիմադիրների մի մասի՝ իշխանությունը չպետք է ստորագրեր նոյեմբերի իննի փաստաթուղթը, իսկ ըստ մյուս մասի՝ իշխանությունը չի համաձայնել շուտ կանգնեցնել պատերազմը, որի արդյունքում նշյալ տարածքները կրկին հանձնվելու էին․ «Սա եւս հանրային գիտակցության վիրավորում է»։
Կարդացեք նաև
Ռուբինյանն ընդդիմությունից պահանջեց հստակ պատասխաններ տալ իր վերոնշյալ հարցերին։ Նաեւ հետաքրքրվեց՝ ի՞նչ կանեին, եթե նոյեմբերի իննի դրությամբ լինեին իշխանություն, որ պատերազմ չլիներ։
Հավելենք, որ «Պատիվ ունեմ» խմբակցության պատգամավոր Հայկ Մամիջանյանը եւ ՀՀԿ փոխնախագահ Էդուարդ Շարմազանովն Aravot.am-ի հետ զրույցում ավելի վաղ պատասխանել են վերջին հարցին։
Լուիզա ՍՈՒՔԻԱՍՅԱՆ
