«Ազգային անվտանգություն» կուսակցության հիմնադիր նախագահ Գառնիկ Իսագուլյանը վերջին մեկ-երկու օրերին ԱԺ-ում Նիկոլ Փաշինյանի եւ իշխանական պատգամավորների՝ Արցախի կարգավիճակի եւ հետագա ճակատագրի մասին արած հայտարարությունների ու ելույթների առիթով այսօր «Հայելի» ակումբում իմքայլական ամենաակտիվ պատգամավորներից մի քանիսին հիշեցրեց իրենց անցած ճանապարհն ու կենսագրությունը, թե ինչպես են քաղաքական ճամբարներ փոխել, նախկինների օրոք պաշտոններ ու դիրք զբաղեցրել բոլոր հետեւանքներով, իսկ հիմա էլ հաջողությամբ համալրել են իմքայլականների շարքերը:
«Բայց իմ ցավը դա չէ: Իմ ցավն այն է, որ մարդիկ գնացել ու նրանց ձայն են տվել: Որեւէ մեկի անմեղության կանխավարկածը չխախտելով, որպեսզի վրաս նոր քրեական գործ չհարուցեն, հաղորդում չեմ տալիս, այլ, հիմա հաճախ կիրառվող տերմիններ օգտագործելով՝ անհասցե ասում եմ. ողջամիտ կասկած ունեմ, որ ԱԺ իշխող խմբակցության պատգամավորների, կառավարության անդամների համար կարեւորը իշխանությունն է, փողը, այդ պահի իրենց անձնական շահը, որի համար կծախեն ամեն ինչ:
Ասում է՝ միջազգային հանրություն: Ես, լինելով նախագահի՝ ազգային անվտանգության հարցերով խորհրդական, ժամանակին պատիվ ունեցել եմ ինչ-որ փաստաթղթեր տեսնել: Այդ ո՞ր փաստաթղթերն են, ո՞ր միջազգային հանրությունն է իրեն ասել՝ իջեցրու Արցախի կարգավիճակի նշաձողը: Միջազգային հանրությունն իր համար Ալիեւն է՞: Կրկնում եմ, ինձ ցավ է պատճառում այն միտքը, թե ո՞նց են հիմա Հայաստանում հայերը իրենց տանը հանգիստ քնում: Իմ համար շատ ծանր է, որ հիմա չեմ կարողանում Արցախ գնալ: Դատարանն արգելել է Հայաստանից բացակայել: Երկու նիստ է՝ հարց եմ բարձրացնում, որ ինձ Արցախ գնալ թույլատրվի, դատախազը չի բարեհաճում գալ դատական նիստի, որպեսզի դատարանը թույլ տա»,-ասաց Գառնիկ Իսագուլյանը:
Աշոտ ՀԱԿՈԲՅԱՆ
