Խորհրդարանում կառավարության հետ հարցուպատասխանի ժամանակ ստեղծված խառնաշփոթից ու ընդդիմադիրների բոյկոտից հետո «Հայաստան» խմբակցության պատգամավոր Գեղամ Մանուկյանը լրագրողների հարցին՝ Նիկոլ Փաշինյանը բացահայտում ուներ, ինչո՞ւ չմնացիք լսեիք՝ պատասխանեց. «Նիկոլ Փաշինյանը այնքան է բացահայտել, այդ նույն ստերի շարանը ի՞նչ լսեինք: Խուսափելու հարց չկար: Ոչ թե այս կամ այն հարցի շուրջ Նիկոլ Փաշինյանից պետք է ակնկալեինք ինչ-որ պատասխան, այլ մենք հրապարակեցինք այն հիմնական թեզերը, որ այսօր հանրության հսկայական զանգվածի, մեր հայրենակիցների մոտ հասունացել է, որը դարձել է այլեւս հանրային հրաժարականի պահանջ»:
Գեղամ Մանուկյանը, խոսելով խորհրդարանի աշխատանքներին մասնակցել-չմասնակցելու մասին՝ ասաց, որ իրենց մուտքը ԱԺ փակ չէ ու մանդատը պետք է կիրառեն նոր կառավարության, նոր վարչապետի համար. «Մեր հայրենակիցների գերակշռող մասի համար այլեւս հստակ է՝ ամեն օր մնալը այս իշխանության հանգեցնելու է բարդ հետեւանքների, վստահեցնում եմ ձեզ, որ այդ հանրային պահանջը շատ ավելի զորավոր է դառնալու: Այսօր ԱԺ-ի այս շրջափակումը տեսնելուց հետո մարդ ապշում է: Այդքան սրտերում վախ կա, վստահաբար նրանք խորքային տեղեկություն ունեն ինչ ծավալի դժգոհություն է հասունացած: Մեկ բան ասեմ՝ այսօր հարցնո՞ւմ եք՝ 2 շաբաթ առաջ գերի է ընկել մեր զինվորը, որեւէ բան արե՞լ է իշխանությունը»:
Մեկնաբանելով ԱԱԾ-ի հայտարարությունը՝ Գեղամ Մանուկյանն ասաց, որ դա իշխանությունների մոտ խուճապի նշան էր,մարդկանց մոտ վախ էին տարածում. «ԱԱԾ-ն երեւի պատկերացրել է, որ Փաշինյանն է ընդդիմության ղեկավարը ու Փաշինյանը փորձում է Մարտի 1 կրկնել»:
Հռիփսիմե ՋԵԲԵՋՅԱՆ
