Էկոնոմիկայի նախարար Վահան Քերոբյանն այսօր կառավարության նիստում լաստանավային հաղորդակցության մասին հացը ներկայացնելիս նշեց, որ պայմանագիր են կնքել լաստանավային հաղորդակցություն իրականացնող ընկերության հետ, որը պայմանագիր ունի «Հարավկովկասյան երկաթուղիներ» ընկերության հետ: Նախարարն ասաց, որ հունիսի 15-ից Փոթի եւ Կովկաս նավահանգիստների միջեւ գործարկվելու է շաբաթական երկու անգամ ամեն ուղղությամբ կանոնավոր լաստանավային հաղորդակցություն:
Պարոն Քերոբյանն ասաց, որ ՀՀ-ն սուբսիդավորելու է լաստանավային հատվածը:
Վարչապետ Նիկոլ Փաշինյանը հետաքրքրվեց՝ սուբսիդավորել ասելով ամբողջությա՞մբ են վճարելու: Ստանալով դրական պատասխան, Փաշինյանը պարզաբանեց՝ փոխադրողը կվճարի բուն երկաթուղու համար, լաստանավի համար կվճարի Հայաստանի Հանրապետությունը:
Վարչապետի խոսքով, երկար տարիներ առնչվել ենք Վերին Լարսի թողունակության հետ կապված խնդիրներին՝ այդ թվում եղանակային պայմանները, բայց հիմա այս հիմնախնդիրն ավելի սրվել է՝ ուկրաինական իրադարձությունների պատճառով: Ըստ Փաշինյանի, Սեւ ծովով ծովային փոխադրումների հետ կապված որոշակի սահմանափակումներ են առաջացել, ինչը հանգեցրել է նրան, որ ծովից բավական մեծ քանակով բեռներ տեղափոխվել են ցամաքով փոխադրման դաշտ, ինչի արդյունքում Վերին Լարսի անցակետի ծանրաբեռնվածությունը մեծացել է:
Կարդացեք նաև
«Մենք այս գործընթացը սկսել էինք մինչեւ ուկրաինական իրադարձությունները»,-ասաց Նիկոլ Փաշինյանը՝ նշելով, որ լաստանավային փոխադրումը տեղի կունենա շաբաթը երկու անգամ կոնկրետ ժամերի, այլ ոչ թե ինչպես նախկինում էր՝ մինչեւ լաստանավը չբեռնվեր, չէր շարժվի. «Հիմա, քանի որ կառավարությունը սուբսիդավորում է, ասում է՝ ոչ, եկեք ապահովենք կանխատեսելի եւ թափանցիկ չվացուցակ, որպեսզի բոլորի համար պարզ լինի»:
Փոխվարչապետ Մհեր Գրիգորյանը հավելեց, որ Վերին Լարսում վիճակը շատ բարդ է եւ կուտակումները ոչ ԵԱՏՄ երկրների բեռներ են, ինչը նշանակում է, որ Լարսում մաքսային ու սահմանային հսկողությունը դանդաղել է եւ 700 մեքենայի թողունակությունը չեն կարողանում ապահովել, որպեսզի հատեն սահմանը: Ըստ փոխվարչապետի, պատճառներից մեկն էլ այն է, որ այդ մեքենաների զգալի մասը ԵԱՏՄ մեքենաների կարգավորումները չունեն եւ դանդաղ են անցնում սահմանը:
Մհեր Գրիգորյանը նաեւ հայտնեց, որ բեռների հոսքը Լարսով ավելանալու է, քանի որ գնալով նավագնացությունը նվազում է:
Վահան Քերոբյանը հայտնեց, որ այսօր Վրաստանի հատվածում 12 հազար մեքենա կուտակվել է, որից 1000-ը հայկական մեքենաներ են:
Լուսինե ԲՈՒԴԱՂՅԱՆ
