«Անհեթեթ է ասել, թե Արցախի համար եք կռվում, ուրեմն գնացեք Արցախ։ Այդ փուլն անցել է։ 2020թ․-ին հազարավոր կամավորներ գնացել են Արցախ, բայց քանի որ որոշումներն ընդունվում են Երեւանում, պատերազմում է պետությունը, հայտարարում մոբիլիզացիա, գնում սպառազինություն, ապա անիմաստ է գնալ խրամատ պահելու, եթե ղեկավարությունը կարող է հրաման տալ դիրք հանձնելու, ինչպես բազմիցս եղել է նոյեմբերի 10-ից հետո»,- Ֆրանսիայի հրապարակում այսօր «Հայկական նախագիծ» գիտակրթական հ/կ-ի հերթական քննարկման ժամանակ հայտարարեց տարածաշրջանային եւ անվտանգության հարցերի փորձագետ Կարեն Իգիթյանը։ Նրա խոսքով՝ խնդիրները կարող են լուծվել այն դեպքում, երբ իշխանության գան ազգային ուժերը։
Ապա քաղաքացիներից մեկը կարծիք հարցրեց առաջին նախագահի վերջին հոդվածի հետ կապված։ Կարեն Իգիթյանը նշեց՝ ինչպես այն ժամանակ, այնպես էլ հիմա անհեթեթ է նաեւ այս իշխանության պնդումը, թե իրենք խաղաղություն են ուզում, իսկ ընդդիմությունը՝ պատերազմ․ «Իրականում հակառակն է։ Իշխանությունն անընդհատ դրական ազդակներ է ստանում, որի դիմաց մենք անընդհատ ինչ-որ բան ենք զիջում։ Դա է պատերազմը։ Պատերազմը միայն սպանելով չի լինում։ Պատերազմ է նաեւ այն, որ որեւէ երկիր հաստատում է իր իշխանությունը։ Երբ Ադրբեջանը եկավ եւ մեր ռազմավարական ճանապարհը փակեց, դա պատերազմ է։ Եթե Ադրբեջանը նպատակ ունի Երեւան գալու, որի մասին բազմիցս ասել է եւ ենթակառուցվածքներ է ստեղծում գալու համար, ապա կամ այս կառավարությունն ուղղակի դուռը փակելու է, հանձնելու է՝ գնա, կամ ինչ-որ պահից պատերազմելու ենք։ Սա հանձնողի եւ չհանձնողի հարց է։ Չհանձնողներն իրականում կարողացել են այնպես անել, որ պատերազմ չլինի, եւ դա է տարբերությունը»։
Ներկաներից մեկը նաեւ հետաքրքրվեց՝ ինչո՞ւ ՀՀ-ն մինչեւ հիմա չի ճանաչել Արցախի անվտանգությունը։ Կարեն Իգիթյանը պատասխանեց՝ կարծում եմ, որ հարցն առաջին նախագահին պետք է հղել։
Լուիզա ՍՈՒՔԻԱՍՅԱՆ
