Վանաձորի քրեակատարողական հիմնարկից երեկ ազատ է արձակվել Գյումրու նախկին քաղաքապետ Վարդան Ղուկասյանի որդին՝ Սպարտակը։ Նա ամբողջությամբ կրել է դատարանի վճռով սահմանված 7-ամսյա պատիժը։ Իսկ այսօր արդեն Սպարտակ Ղուկասյանը մասնակցել է հանգուցյալ հորեղբոր աղջկա հարսանիքին։ Համացանցում հայտնվել են նրա մասնակցությամբ որոշ հարսանեկան լուսանկարներ։
Հիշեցնենք, որ Սպարտակ Ղուկասյանը ազատազրկման էր դատապարտվել ոստիկանության ծառայողի նկատմամբ բռնություն գործադրելու մեղադրանքով: Նրան մեղադրանք էր առաջադրվել ՀՀ Քրեական օրենսգրքի 316 հոդվածի 1-ին մասով։
Ըստ քննչական կոմիտեի պաշտոնական հաղորդագրության․ «Գյումրի քաղաքի բնակչուհին դիմում է ներկայացրել այն մասին, որ 2021 թ. օգոստոսի 17-ին՝ ժամը 23:00-23:15-ի սահմաններում, Գյումրի քաղաքի նախկին քաղաքապետ Վարդան Ղուկասյանը որդու՝ Սպարտակ Ղուկասյանի և երեք-չորս տղամարդկանց հետ մտել է իր տան բակ՝ իր թոռան հետ պարզաբանումներ կատարելու նպատակով։
ՀՀ ոստիկանության Կումայրիի բաժնի քրեական հետախուզության աշխատակիցները, քաղաքացու դիմումում մատնանշված հանգամանքները ստուգելու նպատակով, այցելել են Գյումրու նախկին քաղաքապետի բնակության վայր, սակայն Սպարտակ Ղուկասյանը նախ՝ հրաժարվել է տան դուռը բացել, այնուհետև՝ ժամեր անց, զանգահարել է իշխանության ներկայացուցիչ հանդիսացող ՀՀ ոստիկանության Կումայրիի բաժնի քրեական հետախուզության բաժանմունքի պետին, սպառնացել բռնություն գործադրել նրա նկատմամբ` կապված վերջինիս կողմից իր ծառայողական պարտականությունները կատարելու հետ»:
Կարդացեք նաև
Այս քրգործը հետաքրքրական էր նրանով, որ Շիրակի մարզի ընդհանուր իրավասության դատարանը մի անգամ դատարանի դահլիճից ազատ արձակեց ձերբակալված Սպարտակ Ղուկասյանին՝ չբավարարելով նրան երկամսյա կալանքի վերցնելու քննիչի ներկայացրած միջնորդությունը։ Սակայն դատախազությունը պայքարեց նրան կալանավորելու համար․ բողոքարկեց Շիրակի մարզի ընդհանուր իրավասության դատարանի որոշումը ՀՀ վերաքննիչ դատարան։
ՀՀ Վերաքննիչ դատարանը սեպտեմբերի 15-ին բավարարեց դատախազության բողոքը, որոշեց, որ Սպարտակ Ղուկասյանը պիտի կալանավորվի։ Սակայն այդ որոշումից հետո էլ Սպարտակ Ղուկասյանը դիմեց փախուստի։
Նրան հայտնաբերեցին նոյեմբերի 27-ին ու կալանավորեցին։
Դատարանը նրան 7-ամսյա պատժի ենթարկեց, որը կրելուց հետո ազատ արձակվեց։
Նունե ԱՐԵՎՇԱՏՅԱՆ
