Հանրային հեռուստատեսությանը տված հարցազրույցում պատասխանելով այն հարցին, թե Ադրբեջանի չնվազող ագրեսիայի ֆոնին դեռ հավանական համարո՞ւմ է Խաղաղության պայմանագրի կնքումը Ադրբեջանի հետ մինչեւ տարեվերջ, Նիկոլ Փաշինյանն ասաց, որ ամեն ինչ կանեն դրա համար. «Շատ կարեւոր է, որ մենք գլխագրային խոսակցություններից անցում կատարենք բովանդակային խոսակցությանը»: Ապա` նշեց, որ Խաղաղության պայմանագրի մի քանի տարբերակներ կան. «Օրինակ կա տարբերակ՝ ստորագրել շրջանակային համաձայնագիր, որը ընդհանուր շրջանակն է գծագրում հարաբերությունների…Եթե այսպիսի տարբերակով Ադրբեջանի համար ընդունելի լինի առաջ գնալ, հնարավոր է անենք: Էլի եմ ուզում ասել, որ մենք մեզնից կախված ամեն ինչ կանենք դրա համար: Բայց Խաղաղության պայմանագրի ուժի մեջ մտնելուց առաջ պետք է դելիմիտացիայի գործընթացը ավարտված լինի»:
Նրա խոսքով. «Հակառակ դեպքում կարող է Խաղաղության պայմանագիր ստորագրենք, եւ Ադրբեջանը շարունակի տարածքային նկրտումներ ներկայացնել Հայաստանի նկատմամբ, դրա համար մենք ասում ենք, որ պետք է սահմանների հստակեցում լինի: Հիմա մի քայլ արել ենք այդ ճանապարհին՝ հղում կատարելով Ալմա Աթայի հռչակագրի բովանդակությանը: Պետք է նաեւ հաջորդ քայլերը անենք»:
Փաշինյանն ասաց, որ Խաղաղության պայմանագրի շրջանակային եւ ոչ շրջանակային տարբերակներ կան. «Մենք նաեւ մեր առաջարկներն ենք ներկայացրել Խաղաղության պայմանագրի վերաբերյալ, նաեւ Վաշինգտոնում տեղի ունեցած հանդիպման ընթացքում տեքստի մեր տարբերակը ներկայացրել ենք քննարկման, հույս ունենք, որ Ադրբեջանը կքննարկի այն»:
Նա նաեւ չբացառեց, որ տեսականում եւ գործնականում հնարավոր է Խաղաղության պայմանագիր ստորագրել, եւ դրանից 12 ժամ հետո կարող է պատերազմ սկսվել, ինչպես եղավ սեպտեմբերի 13-ին:
Կարդացեք նաև
Գոհար ՀԱԿՈԲՅԱՆ
