Ազատության հրապարակից այսօր՝ դեկտեմբերի 20-ին, շոու բիզնեսի ներկայացուցիչների նախաձեռնությամբ մեկնարկեց «Հանուն կյանքի ճանապարհի» քայլերթը, որի նպատակն էր միջազգային հանրության ուշադրությունը բևեռել Գորիս-Ստեփանակերտ փակ ճանապարհի վրա և պահանջել անհապաղ բացել «կյանքի ճանապարհը»:
Շոու բիզնեսի ներկայացուցիչներին միացած մի շարք քաղաքացիներ, «Բացեք, կյանքի ճանապարհ», «Մենք ենք Արցախը», «Արցախ», «Ոչ, ցեղասպանությանը» կոչերով, քայլերթով շարժվեցին դեպի Ռուսաստանի Դաշնության դեսպանատուն, Ֆրանսիայի դեսպանատուն, այնուհետև ՄԱԿ-ի հայաստանյան գրասենյակ։
«Ինձ թվում է առաջին հերթին մտահոգությունն է, քանի օր է տեսնում էինք, որ ՄԱԿ-ի հայաստանյան գրասենյակի առջև ակցիաներ են իրականացնում, մենք էլ էինք միանում այդ ակցիային, բայց հասկացանք, որ ավելի շատ մարդկանցով, ավելի մեծ աղմուկ պետք է բարձրացնենք ու ինչքան շատ լինենք, այնքան աղմուկն ավելի մեծ է լինելու: Որքան աղմուկը շատ լինի, այնքան ձայնդ ավելի շատ է լսելի լինելու, ցավոք այսօր աղմուկից են լսում, ոչ թե շշուկից: Այդպես որոշեցինք հավաքվել ու լսելի դարձնել այն, ինչ այսօր հրատապ է , իսկ վաղը կարող է լինել շատ-շատ վտանգավոր ու անխուսափելի հետևանքներով»,-լրագրողներին ասաց դերասանուհի Թամար Պետրոսյանը, ում ծնողները, եղբայրը, հարազատներն ապրում են Արցախում:
Կարդացեք նաև
Ակցիայի կազմակերպիչների խոսքով, իրենց ակցիան քաղաքական բնույթ չի կրում, ուստի իրենք դեպի ՀՀ կառավարություն քայլերթ չեն կատարում: «Նպատակը մեկն է՝ միջազգային հանրությունն անհապաղ գործի ու բացի կյանքի ճանապարհը, սա մարդասիրական ակցիա է, խնդրում եմ ոչ ոք չքաղաքականացնի»,-ասաց կազմակերպիչներից Արտեմ Վալտերը:
«Արցախը Հայաստան է, Հայաստանն՝ Արցախ է: Արցախցին հայ է, իսկ մենք բոլորս պետք է միասնական լինենք, ու այս հարցի լուծումը, ի վերջո, տանք: Չի կարող թշնամին մեր հողում կանգնի, երգի, ու որոշի՝ մեր տեղը, թե մեր հողում չենք ապրելու»,- նշեց երգչուհի Գայա Արզումանյանը:
Լուսինե ՄԱՐԳԱՐՅԱՆ
