Այսօր ՀՀ կառավարությունը ի գիտություն ընդունեց Նազելի Բաղդասարյանի՝ մարզպետի պաշտոնից ազատման մասին դիմումը ու այդ պաշտոնում նշանակեց Մուշեղ Մուրադյանին, որը, ինչպես արդեն գրել ենք, քաջածանոթ է մարզին, առավել ևս Շիրակի մարզպետարանի աշխատակազմին․ երկար տարիներ զբաղեցրել է աուդիտի բաժնի պետի պաշտոնը։
Նազելի Բաղդասարյանի հրաժարականի մասին ֆեյսբուքյան գրառումից հետո շիրակցիները սկսեցին հումորներ անել՝ ըստ էության ծաղրելով թավշյա կառավարիչների՝ մարզպետի պաշտոնի նկատմամբ ցուցաբերած անլուրջ մոտեցումը․ դեռ պաշտոնի չնշանակած, պաշտոնավարման մեկ տարին չլրացած՝ փոփոխություն են անում։
Գյումրեցիները հիշեցնում են, որ լրանում է թավշյա հեղափոխության 5-րդ տարին ու 5-րդ մարզպետն է նշանակվում։
«Շիրակի մարզում 5 տարվա մեջ 5-րդ մարզպետը կփոխենք, տեսնիս իմ հերթս ե՞րբ պտի հասնի»,- գրել է օգտատերերից մեկը, որին ի պատասխան՝ մեկ այլ օգտատեր կատակել է․ «Մի վռազցի, էդ պառադը ձեր դռնով էլ կանցնի»։
Կարդացեք նաև
Օգտատերերից մեկն էլ նշել է․ «Մենք գործում ենք․ «Նոր տարի, նոր մարզպետ» կարգախոսով։
Գյումրեցի զբոսավարներից մեկն էլ կատակել է․ «Գյումրիում բոլորս սրտատրոփ ձյան գալուն կսպասեինք, մեկ էլ բռնեց, թազա մարզպետը էկավ»։
Իրավապաշտպան Կարապետ Պողոսյանն էլ, իր էջում տեղադրելով ընդդիմության հանրահավաքի օրը Հոռոմի խաչմերուկում զոհված զինվորի մայր ձևացած ու սկանդալ սարքած կնոջ լուսանկարը, կատակել է․ «Շիրակի մարզպետ պետք է նշանակվի Անոն, քանի որ ամենաբարձրն ինքն է գոռացել «նիգոոոոոոոլ»։
Նունե ԱՐԵՎՇԱՏՅԱՆ
