Հակակոռուպցիոն դատարանում այսօր Սուրիկ Խաչատրյանի ենթադրյալ ապօրինի գույքի բռնագանձման պահանջով դատախազության հայցի քննության ժամանակ Խաչատրյանի պաշտպանը ներկայացրեց հայցի առարկայի փոփոխությանն առնչվող առարկությունները՝ պարզաբանելով, որ առարկությունները վերաբերում են փոփոխության թույլատրելիությանը:
Պաշտպանի խոսքով, ակնհայտ է, որ իրավասու մարմնի կողմից փորձ է կատարվում փոխել հայցի առարկան՝ պահանջների չափն ավելացնելու միջոցով։ Սակայն, ըստ նրա, իրավասու մարմնի կողմից ներկայացվող հայցի առարկան չի կարող ունենալ ավելի մեծ ծավալ, քան ուսումնասիրության արդյունքների մասին եզրակացության մեջ մատնանշված և անձին պատկանող ապօրինի ծագում ունեցող գույքի շրջանակն է։
«Ընդունում եմ, որ եզրակացության մեջ որոշակի հանգամանքներ, վերլուծություն կամ տվյալներ պետք է ողջամտորեն և տրամաբանորեն ներկայացված լինեն նաև հայցադիմումում։ Ուղղակի ի տարբերություն եզրակացության՝ հայցադիմումը պարունակում է լրացուցիչ մասեր։ Այսինքն՝ եթե եզրակացություն կազմվում է որոշակի գույքերի ենթադրյալ ապօրինության մասին, և դա արդեն հիմք է վարույթը շարունակելու համար, հայցադիմումի մեջ դրանից հետո առկա է նաև շարունակությունը՝ եզրակացության մեջ ներկայացված վերլուծությունների փաստական տվյալների հիման վրա՝ դատախազությունը ներկայացնում է պահանջը՝ ուղղված դատարանին, ինչը, բնականաբար, եզրակացության մեջ չկա և չէր էլ կարող լիներ»,- արձագանքեց դատախազ Քոչարյանը։
Դատարանը հայտնեց, որ հայցի առարկայի միջնորդության վերաբերյալ որոշումը կկայացնի և կուղարկի կողմերին՝ օրենքով սահմանված կարգով։
Կարդացեք նաև
Գործով հաջորդ նիստը նշանակվեց մարտի 3-ին՝ ժամը՝ 15։00-ին։
Արփինե ՍԻՄՈՆՅԱՆ
