«Վերջին տարիներին ես հասկացել եմ մի բան, որ մենք այլևս չպետք է խոսենք օրենքներից, դատավորների, դատախազների կամ նախաքննական մարմինների ապօրինություններից, քանի որ այսօր շատ ավելի կարևոր արժեքներ են ոտնահարվում»,- այսօր, «Այլընտրանքային նախագծերի» կազմակերպած՝ «Իրավական տեռոր՝ կենսական վտանգների շեմին» թեմայով քննարկման ժամանակ կարծիք հայտնեց փաստաբան Լուսինե Սահակյանը:
Քննարկման ընթացքում նա ասաց. «Իշխանությունները հասան նրան, որ երբ հասարակությանն ասում են՝ մեզ տվեք մուրճ, քլունգ, մենք գնալու ենք ապօրինություն անելու, մարդիկ գտնում են, որ դա նորմալ է։ Իրենք հասարակությանն այդպես դաստիարակեցին, որ ապօրինություն կատարելը համարվի նորմալ։ Մինչդեռ առողջ հասարակությունը դրա դեմ կընդվզեր, իսկ եթե ունենք հիվանդ հասարակություն, բնականաբար, չեն էլ գիտակցում, որ այս գործողությունների արդյունքը շատ ավելի վատ է լինելու իրենց համար»:
«Ստացվում է, որ մարդիկ իրականում չէին ցանկանում լավ ապրել, այլ ցանկանում են, որ իրենց հարևանը վատ ապրի։ Եվ այս գաղափարը իշխանություններն ավելի զարգացրեցին։ Եթե տարիներ առաջ մտածում էինք սոցիալական վիճակի վատթարացումով «պայթյուն» կառաջանա, հիմա իշխանությունները հասարակությանն ասում են՝ կարևոր չէ, թե դու լավ կապրես, թե ոչ, սպասիր այնպես անեմ, որ մյուսն էլ վատ ապրի։ Եւ այդ մուրճի գաղափարը բերեցին իրավական համակարգ»,-ասաց փաստաբանը:
Հանրագումարում, ըստ փաստաբանի, ստացվում է, որ իշխանություններն ապօրինություններ են գործում, իսկ մարդիկ դրա համար ուրախանում են. «Ապօրինի կալանավորում են, ապօրինի դատում են և մարդիկ չեն ասում՝ ինչո՞ւ է ապօրինություն կատարվում։ Արդյունքում, կարևորագույն գաղափարներն արժեզրկվել են։ Հասել ենք նրան, որ հայրենիքը մեզ համար այլևս կարևոր չէ, հողերը կարևոր չեն։ Մեր երեխաների կյանքն արժեզրկվեց, քանի որ այդքան երեխաների կորուստն այլևս ոչ մեկին չի զարմացնում»:
Կարդացեք նաև
Նելլի ԳՐԻԳՈՐՅԱՆ
