ՀՀ կառավարության այսօրվա նիստը վարում էր ՀՀ փոխվարչապետ Մհեր Գրիգորյանը, քանի որ Նիկոլ Փաշինյանը երկօրյա աշխատանքային այցով մեկնել է Գերմանիա:
Տարածքային կառավարման և ենթակառուցվածքների նախարար Գնել Սանոսյանն առաջարկեց պետական բյուջեից ՏԿԵ նախարարությանը 1 միլիարդ 100 միլիոն դրամ հատկացնել, որի նպատակն է քաղաքային զարգացման ծրագրի շրջանակում Աջափնյակում մետրոյի նոր կայարանի կառուցման նախագծային ու նախահաշվային աշխատանքների իրականացումը:
«Աշխատանքները բաղկացած են երեք փուլից, այժմ երկրորդ փուլում ենք, և կարիք կա վճարել նախագծող ընկերությանը։ Երևանի քաղաքապետարանն արդեն 545 մլն դրամ վճարել է, իսկ ընդհանուր առմամբ, անհրաժեշտ գումարը 1 միլիարդ, 848 միլիոն դրամ է։ Տարբերությունն էլ ինչ մնա, քաղաքապետարանը կտա»,- նշեց Սանոսյանը։
Նախարարը խնդրեց Երևանի փոխքաղաքապետ Տիգրան Ավինյանին լրացնել ծրագրի իրականացման մանրամասները։
Կարդացեք նաև
Ավինյանը տեղեկացրեց, որ 48 ամիս է տևելու կայարանի կառուցումը, այն ունենալու 1.5 կմ երկարություն, կայարանի շինարարությունը ենթադրում է նաև մետրո-կամուրջ, որն այս պահին 2 տարբերակով են դիտարկում։
«1980-ականների ծրագրի համեմատ որոշակի փոփոխություններ ենք իրականացրել։ «Թումո»-ի նույն մայթին, Հալաբյան-Աբելյան անկյունում է լինելու կայարանը, բաց տարածքում է լինելու շինարարությունը, վերևից ենք փորելու։ Երկրորդ փուլն ավարտելուն պես մենք կունենանք նախագիծ, որը կուղարկենք փորձաքննության»,- նշեց Ավինյանը։
Նիստի օրակարգում ընդգրկված է 28 հարց, որից 26-ը չի զեկուցվում: Եվս 3 հարց գաղտնի է:
Լուսինե ՄԱՐԳԱՐՅԱՆ
