«Նման փաստաթուղթ պաշտոնական Ստեփանակերտը չի ստացել»,- Aravot.am-ի հետ զրույցում ասաց Արցախի նախագահ Արայիկ Հարությունյանի մամուլի խոսնակ Լուսինե Ավանեսյանը:
Խոսքը արտակարգ եւ լիազոր դեսպան Դավիթ Շահնազարյանի՝ օրերս հրապարակած փաստաթղթի մասին է:
Հիշեցնենք, Արցախն Ադրբեջանի կազմում ինտեգրելու 12 ամիս տեւողությամբ ճանապարհային քարտեզը, որն ըստ Դավիթ Շահնազարյանի՝ բաղկացած է չորս կետից, Ադրբեջանի իշխանությունը փոխանցել է Հայաստանի իշխանությանը: Ըստ Դավիթ Շահնազարյանի տեղեկության, ՀՀ իշխանություններն այդ փաստաթուղթը պետք է փոխանցեն Արցախի իշխանություններին:
Արցախի նախագահի մամուլի խոսնակից հետաքրքրվել էինք՝ նման փաստաթուղթ ՀՀ իշխանությունները փոխանցե՞լ են Արցախի իշխանություններին: Եթե՝ այո, ապա՝ ի՞նչ դիրքորոշում ունի Արցախի իշխանությունը դրա վերաբերյալ:
Կարդացեք նաև
Ի դեպ, ՀՀ վարչապետի մամուլի խոսնակ Նազելի Բաղդասարյանն Aravot.am-ի հարցմանն ի պատասխան ասել էր. «Բանակցային գործընթացի վերաբերյալ պաշտոնական անդրադարձ եղել է եւ այս պահին հավելյալ ասելիք չկա»:
Նկատենք, որ հարցադրումը բանակցային գործընթացին չէր վերաբերվում, այլ Դավիթ Շահնազարյանի հայտարարած փաստաթղթի գոյությանը, դրա՝ ՀՀ-իշխանություններին փոխանցելուն:
Նազելի Բաղդասարյանի պատասխանը ենթադրու՞մ է, որ այդ փաստաթուղթը բանակցային գործընթացի մաս է. հարցը հռետորական է:
Նելլի ԳՐԻԳՈՐՅԱՆ
