«Ապրելու երկիր» կուսակցությունն այսօր ներկայացրեց «Երևան-Բուլվարի» և «Ֆրանսիայի հրապարակի» մեգանախագծերը:
«Երևան Բուլվար» մեգանախագծով Կենտրոն վարչական շրջանի՝ հետիոտնին նախատեսված հատվածը վերադարձվելու է իրեն։ Մեգանախագծով առաջարկվում է գոյություն ունեցող հինգ կանաչ գոտիները՝ Երեւանի 2750-ամյակի այգին, Երեւանի 2800-ամյակի այգին, Ռուսաստանի հրապարակը, Մանկական այգին եւ Անգլիական այգին միավորել մեկ միասնական՝ Երևան բուլվարում, հարակից փողոցները դարձնել հետիոտնային, իսկ մեքենաների հոսքն ուղղորդել ստորգետնյա անցումներ։ Այս ամենի արդյունքում ձեւավորվելու է ուղիղ և անվտանգ կապ Հանրապետության հրապարակից դեպի Ռուսաստանի հրապարակ, ստեղծվելու են նաև լրացուցիչ ստորգետնյա կայանատեղիներ։
«Ֆրանսիայի հրապարակի» նախագիծը հնարավորություն կտա Սարյանի և Կոնսերվատորիայի այգիները միացնել միմյանց, Սայաթ-Նովայի պողոտան անխոչընդոտ կշարունակվի դեպի Բաղրամյան պողոտա՝ առանց լուսացույցային կանգառի, իսկ Մաշտոցի պողոտան կունենա ևս մեկ ստորգետնյա թունել՝ ինչպիսին պողոտայի սկզբնամասում։
«Ապրելու երկիր» կուսակցության նախագահ, քաղաքապետի թեկնածու Մանե Թանդիլյանը հայտարարեց՝ Երեւանը վերադարձնում ենք մարդկանց, հետիոտնին, Երեւանը դառնում է այն քաղաքը, որտեղ քայլում ենք, զբոսնում ենք գլուխներս բարձր. «Սա մեր արժեքահեն, խնդիր լուծող ծրագրի մաս է: Կանաչ Երեւանը, որի մասին մենք խոսում ենք, այսպիսի պուրակներով կառուցված է, ինչպիսին ուզում էր տեսնել Թամանյանը: Մենք Թամանյանի դիմագիծը վերադարձնելու ենք Երեւանին, նա այդպիսին էր տեսնում՝ քաղաք այգի»: Թանդիլյանն ասաց, որ ծրագիրը իրատեսական է, որը նաեւ ստեղծելու է աշխատատեղ. «Կառուցման ընթացքում, մենք հաշվարկել ենք, որ մինչեւ 1000 աշխատատեղ է ստեղծվելու, հետագայում պահպանման համար 100-ից ավելի աշխատատեղ»:
Կարդացեք նաև
Հռիփսիմե ՋԵԲԵՋՅԱՆ
